کابل (پژواک ۳ لیندۍ ۱۴۰۰): په اسلام اباد کې افغان سفارت وايي، تردې وروسته د تورخم له لارې تر ۸ کلونو کم عمره ماشومان له پاسپورټ او ویزې پرته پاکستان ته د تګ اجازه ورکول کېږي.
سرچينې دغه مطلب نن (چهارشنبه) ناوخته په خپلې فېسبوک پاڼه کې خپور کړی دی.
سرچينې دغه راز زياته کړې چې تر دې وړاندې پاکستاني لوري له یو کال کم عمر ماشومانو ته له پاسپورټ او ویزې پرته د تورخم له لارې د تګ اجازه نه ورکوله.
سرچينه کاږي، همدا راز دواړو لورو هوکړه وکړه چې هره ورځ به ۱۰۰ افغان ناروغانو ته هم له اسنادو پرته پاکستان ته د تګ اجازه ورکول کېږي.
سرچينه وايي چې د دواړو هېوادونو تر منځ د تګ راتګ په برخه کې د لا نورو اسانتیاو لپاره هڅې روانې دي.
خو په کابل کې د پاکستان سفارت يوې سرچينې، پژواک ته وويل چې له تورخم څخه هيڅ ناروغ له اسنادو پرته د تګ اجازه نه لري او د پخوا په څېر به يې طبي راپور او ويزه کتل کېږي او تر هغه وروسته به پاکستان ته د تللو اجازه ورکول کېږي.
ده زياته کړه، دوی يواځې بيړنيو ناروغانو ته ژر ويزه ورکولای شي.
Views: 316
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن