محمودراقي (پژواک، ۳ لیندۍ ۱۴۰۰): د کاپیسا مرکز کې ناپېژاندو وسله والو برید کې دوه دیني عالمان وژل شوي او دوه نور ټپیان دي.
د کاپیسا د اطلاعات او کلتور رییس مولوي کریم الله وثیق وايي چې دغه پښه نن سهار ۱۰:۳۰ بجې د کاپیسا مرکز اړوند ریګروان سیمه کې داسې مهال رامنځته شوې چې د دیني مدرسې څلور کسان کورونو ته روان وو.
د ده په خبره، په دغه وسله وال برید کې د امام اعظم دارالعلوم امر مولوي روح الله حنیف یار او د دې مدرسې استاد مولوي بشیراحمد مولوي زاده وژل شوي او دوه نور دیني عالمان ټپیان دي.
د نوموړي په خبره، امنیتي ځواکونه د پېښې د عاملینو پیدا کولو هڅې کوي.
دغه راز د امام اعظم دارالعلوم د امر روح الله حنیف یار ورور نعمت الله حنیف یار دغه پېښه تاییدوي او وايي چې ورور یې له هېچا سره شخصي دښمني نه درلوده.
د یادې پېښې مسوولیت تر اوسه چا نه دی منلی.
Views: 26
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن