کابل (پژواک، ۸ لېندۍ ۱۴۰۰): د افغانستان د سرپرست حکومت مرستیال ویاند وایي، متحده عربي اماراتو د پخواني ولسمشر غني په ګډون د تېر حکومت پر هغو لوړپوړو چارواکو د سیاسي فعالیت بندیز لګولی چې دا مهال په اماراتو کې اوسېږي.
د افغانستان پخوانی ولسمشر محمد اشرف غني او ورسره یو شمېر نور پخواني چارواکي د روان کال د زمري په ۲۴مه له هېواده ووتل او وروسته کابل طالبانو ونیو. غني او ځیني نور پخواني افغان چارواکي دا مهال په متحده عربي اماراتو کې مېشت دي.
د افغانستان د سرپرست حکومت مرستیال ویاند احمدالله وثیق پر خپله ټويټرپاڼه لیکلي: «متحده عرب اماراتو د اشرف غني ادارې پر ټولو هغو چارواکو د سیاسي فعالیت بندیز لګولی چي په دوبۍ او نورو ښارونو کې اوسېږي.»
ده لیکلي چې په دغه محدودیت کې اشرف غني، د بلخ پخوانی والي عطا محمد نور او د افغانستان د ملي امنیت شورا پخوانی سلاکار حمدالله محب هم شامل دي.
محمد اشرف غني او متحده عربي اماراتو تر اوسه په دې اړه څه نه دي ویلي.
GET IN TOUCH
NEWSLETTER
SUGGEST A STORY
PAJHWOK MOBILE APP