زرنج (پژواک، ۱۱ لېندۍ ۱۴۰۰): په نيمروز کې د افغان او ايراني پوله ساتونکو ترمنځ جګړه چې پرون مازدیګر رامنځته شوې وه، د دواړو لورو په همغږۍ کنټرول شوه او پاى ته رسېدلې ده.
د ځينو رسنيو د راپورونو له مخې، دغه نښته تېر مازديګر شاوخوا پنځه بجې د نيمروز ولايت په کنګ ولسوالۍ کې د پوله ساتو ځواکونو ترمنځ شوې ده.
د افغانستان د حکومت وياند ذبيح الله مجاهد وايي: «د نيمروز ولايت د کنګ ولسوالۍ په سرحدي سيمه کې د افغان او ايراني پوله ساتونکو تر منځ په سيمه ييزه کچه ناسم پوهاوی رامنځته شوی و چې اوس د دواړو لورو په همغږۍ وضعیت کنټرول شوی دی. د دې غلط فهمۍ د مخنیوي او څېړنې په موخه د اسلامي امارت مسوولینو لازم هدایت ورکړی دی.”
په ورته مهال په کابل کې د ایران سفارت د دغه هېواد د بهرنیو چارو وزارت د ویاند سعید خطیب زاده له قوله په ټویټر کې لیکلي: «نن مازدیګر د سیستان په سرحدي سیمه کې د پوله ساتونکو ترمنځ اختلاف د دواړو خواو له لوري په ډزو بدل شو چې د دواړو لورو د سرحدي ځواکونو په همغږۍ سره پای ته رسېدلی دی.»
که څه هم سرچينو تر اوسه د پېښې د اصلي لامل په اړه جزئيات نه دي ورکړي؛ خو د نيمروز اوسېدونکي احمدالله پژواک ته وويل چې جګړه هغه مهال رامنځته شوه، چې ايراني پوله ساتونکو يو افغان موټر چلوونکى وواهه.
Views: 28
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن