سمنګاني: د پخوانیو پوځیانو د وژلو راپور ناسم دی؛ خو په تړاو یې څېړنو کې همکاري کوو

کابل (پژواک، ۱۴ لېندۍ ۱۴۰۰): ۲۲ هېوادونو پر هغه راپور چې ګواکې د افغانستان یو شمېر پخواني امنیتي منسوبین وژل شوي او یا ورک دي، اندېښنه ښودلې، خو افغان حکومت، که څه هم دغه راپور پروپاګند بولي، وایي په تړاو یې هر ډول څېړنو کې همکاري کوي.

د  امریکا متحده ایالتونو په ګډون د نړۍ ۲۲ هېوادونو په یوه ګډه اعلامیه کې ویلي چې دوی د افغان امنیتي ځواکونو د پخوانیو غړو د وژنو او ورکېدو په اړه د بشري حقونو د څار سازمان راپور اندېښمن کړي دي.

د راپورونو پر بنسټ، د بشري حقونو د څار سازمان تېره اونۍ راپور خپور کړ چې ګواکې د افغان امنیتي ځواکونو د پخوانیو سرتېرو د وژلو ۴۷ پېښې یې مستندې کړې دي.

په راپور کې راغلي، دغه وژنې- چې ادعا کېږي د روان کال د اګسټ له نیمايي د اکټوبر تر وروستیو رامنځته شوې-  له بشري حقونو او د افغانستان د سرپرست حکومت له خوا له اعلان شوې عفوې سره په ټکر کې دي.

سرچینې د یادو پېښو د څېړنې غوښتنه کړې او د افغانستان له حکومته یې غوښتي چې اعلان شوې عمومي عفوه په موثر ډول پلې کړي.

خو د افغان حکومت د ویاند مرستيال انعام الله سمنګاني بيا د پخواني حکومت د پوځيانو د وژل کېدو ادعا په جدي ډول ردوي او زیاتوي: «په دې تړاو هيڅ شواهد نشته او پروپاګند دي.»

هغه زیاتوي چې په لويو نړيوالو ناستو کې بايد څرګندونې مسوولانه او د اسنادو پر مټ وي، نه د شايعاتو او تبلیغاتو له مخې.

سمنګاني وايي: «اسلامي امارت چمتو دی چې په دې تړاو په هر ډول تحقیق او څېړنه کې چې ترسره کېږي، همکاري وکړي.»