کابل (پژواک،۲۵ لېندۍ ۱۴۰۰): د ډالر پر وړاندې د افغانیو ارزښت په لوړېدو سره د لومړنیو خوراکي توکو او مایع ګاز بیې ټيټې شوې، او کابل ښاروالۍ د یوې ۱۴۰ ګرامه ډوډۍ بیه له ۱۵ څخه ۱۰ افغانۍ ته را ټيټه کړې ده.
د کابل په شهزاده سرای کې د صداقت صرافۍ د یوه کارکوونکي حاجي حسین صداقت د معلوماتو له مخې نن یو امریکایي ډالر په ۱۰۱ افغانۍ بدلېده، په داسې حال کې چې پرون د یوه امریکايي ډالر ارزښت ۱۰۵ افغانۍ و.
د یادونې وړ ده چې په دې وروستیو ورځو کې د ډالر پر وړاندې د افغانیو ارزښت په بې ساري ډول راټيت شوی و، د لېندۍ د ۲۲ تر ماښامه یو ډالر په ۱۳۰ افغانۍ تبادله کېده چې په نتیجه کې یې د ټولو وارداتي خوراکي او نفتي موادو بیې لوړې شوې وې.
د کسب ګرو خونې او کابل ښاروالۍ د لېندۍ په ۲۴ مه په یوه اطلاعیه کې ویلي و چې د لنډ مهال لپاره یې د یوې ۲۰۰ ګرامه ډوډۍ بیه ۱۵ افغانۍ او د یوې ۲۷۰ ګرامه ډوډۍ بیه ۲۰ افغانۍ ټاکلې ده.
دا په داسې حال کې ده چې پژواک خبري اژانس د لېندۍ په ۲۱ مه «د کابل ښار په نانواییو کې د یوې لس روپګي ډوډۍ وزن تر ۴۶ ګرامه توپیر لري » تر عنوان یوڅېړنیز راپور خپور کړ. کابل ښاریانو په دې برخه کې د مدیریت له نشتون شکایت درلود.
خو نن د لېندۍ په ۲۵مه کابل ښاروالۍ اعلان وکړ چې د افغانیو پر وړاندې د ډالر د ارزښت او د خوراکي توکو د بیو راټيټېدو له امله یې د ډوډۍ بیه هم ټيټه کړې ده.
د کابل ښاروالۍ ویاند نعمت الله بارکزي پژواک ته وویل د یوې تاقه یې ډوډۍ بیه له ۱۵ نه ۱۰افغانۍ او د یوې جوړه یې ډوډۍ بیه یې له ۳۰ څخه ۲۰ افغانۍ ته ټيټه کړې ده.
هغه وویل:« د ښاروالۍ په اطلاعیه کې زموږ شمېرې شته که کوم نانوای سرغړونه کوي خلک باید موږ ته خبر راکړي زموږ سیارې ډلې ورته رسېدنه کوي.»
په ورته وخت کې د کسب ګرو خونې رئیس نورالحق عمري هم وایي چې تېره ورځ یې له کابل ښاروالۍ سره ناسته کې پرېکړه وکړه چې د ډوډۍ بیه ټیټه کړي.
د هغه په خبره د یوې ۱۴۰ ګرامه ډوډۍ بیه ۱۰ افغانۍ او د یوې ۲۸۰ ګرامه ډوډۍ قیمت ۲۰ افغاني ټاکل شوې ده.
هغه زیاته کړه د ډوډۍ د نرخ د لوړېدو پرېکړه بېړنۍ وه؛ ځکه د اسعارو نرخ لوړ شوی و او ډېری نانوایاانو غوښتل چې خپلې نانوایۍ وتړي چې دغه کار د خلکو په تاوان و.
نوموړي زیاته کړه: «په یاده ناسته کې پرېکړه وشوه، کله چې د اسعارو نرخ ثابت پاتې شو او د ټولو موادو نرخونه خپل عادي حالت ته را وګرځېدل د نو ډوډۍ د دایمي بیه تثبیتوو.»
لومړني خوراکي توکي هم ارزانه شوي دي.
د خوراکي توکو د سوداګرو ټولنې رییس زمری صافی وایي چې نن د لېندۍ په ۲۵مه د ۵۰ کیلوګرامه اوړو بیه له ۲۸۰۰ څخه ۲۵۰۰ افغانیو ته د ۲۴،۵ کیلو پاکستانۍ لومړۍ سیله وریجو بیه له ۳۰۰۰ نه ۲۵۰۰ افغانۍ، د ۴۹کیلوګرام پاکستانۍ بورې بیه له ۴۲۰۰ نه ۳۵۰۰ افغانیو او د ۱۶ لېتره غوړيو بیه له ۳۵۰۰ نه ۲۹۰۰ افغانیو ته را کمه شوې ده.
د کابل ښار د کلوله پشته سیمه کې د ګازو پلورونکي احمد جاوید پژواک ته وویل چې نن د تېرې ورځې په پرتله د یو کیلوګرام ګاز بیه له ۱۲۰ افغانۍ نه ۸۸ افغانیو ته راکمه شوې ده.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن