فراه (پژواك، ٦ مرغومی١٤٠٠): د خوړو نړیوال سازمان (WFP) فراه ولایت کې تر ۱۰۰زره له ډېرو مستحقو کورنیو سره د خوراکي توکو مرسته کوي.
یادې مرستې د «فراداتا» په نوم موسسې له لارې ترسره کېږي.
فراه کې د خوړو نړیوال سازمان استاري حبیب الله امیري د فراداتا ۴۲ کارکوونکو ته چې ټاکل شوې راتلونکو ورځو کې د خوراکي توکو د مرستې بهیر مدیریت کړي د روزنیز پروګرام د پیل پر مهال وویل، فرداتا موسسې ته پر وخت مرستې او اسانتیاوې په واک کې ورکول کېږي.
په ورته وخت کې د فراداتا موسسې مسوول خدالرحیم همت پژواک ته وویل، یاد خوراکي توکي د مستحقو کسانو د پېژندلو تر سروې وروسته له دیني عالمانو او قومي مشرانو سره په همغږۍ د فراه په مرکز او ټولو ولسوالیو کې ۱۰۰زره کورنیو ته وېشل کېږي.
د هغه په وینا، اوړه، وریجې، نخود، لوبیا، غوړي او د خوړو مکملې بستې چې د خوارځواکو ماشومانو او اومېندوارو ښځو لپاره دي په یادو خوارکي توکو کې شامل دي.
نوموړي زیاته کړه چې د دغو توکو د وېش لړۍ د ۲۰۲۲م کال د جنورۍ له لومړۍ پیلېږي او وېش لړۍ به یې شپږ میاشتې وخت ونیسي.
په افغانستان کې د نړیوالې ټولنې له خوا د بشري مرستو د ویش لړۍ له څه مودې راهیسې پیل شوې او دا مهال د هېواد په بېلابېلو ولایتونو کې دوام لري.
دا په داسې حال کې ده چې په افغانستان کې له وروستیو وچکالیو، سیاسي بدلونونو د امریکا له خوا د افغانستان د شاوخوا لس میلیارده ډالرو سرمایې کنګل کولو او پر افغانستان د نورو بندیزونو لګولو له امله په میلیونونو افغانان له سختو اقتصادي ستونزه سره مخ دي.
Views: 21
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن