اروزګان کې د چتونو لوېدو له امله یوه ښځه مړه او څلور ماشومان ټپيان شوي

ترینکوټ (پژواک، ۱۵ مرغومی ۱۴۰۰): د اروزګان په دهراوود ولسوالۍ کې د خونو د چت لوېدو په دوو جلا پېښو کې یوه ښځه مړه او څلور ماشومان ټپیان شوي دي.

دا پېښې تېره شپه د یادې ولسوالۍ په سیزکزي او زرتالې سیمو کې شوې دي.

د اروزګان د اطلاعاتو او فرهنګ رییس محمد اصف پژواک خبري اژانس ته وویل، په دغو پېښو کې- چې د وروستیو ورښتونو له امله رامنځته شوې- یوه ښځه مړه او څلور ماشومان ټپیان شوي دي.

هغه زیاته کړه، لومړۍ پېښه د دهراوود ولسوالۍ په زرتالې سیمه کې شوې چې له امله یې یوه زړه ښځه مړه شوې ده.

دی وايي، دویمه پېښه هم د همدې ولسوالۍ په سیزکزي سیمه کې شوې چې له امله ۴ ماشومان ټپیان شوي او د سیمې د خلکو په مرسته د درملنې په موخه روغتون ته لېږدول شوي دي.

نوموړي وویل چې ډېری کورونه خام او پخوا جوړ شوي چې د ډېر ورښت پر وړاندې مقاومت نه لري.

دغه راز د دهراوود ترڅنګ په یو شمېر نورو ولسوالیو کې هم د وروستیو ورښتونو له امله سېلابونه راوتلي او د خلکو ځمکې او کورونه یې زیانمن کړي دي.

د مرکز ترینکوټ یوه اوسېدونکي باریداد پژواک خبري اژانس ته وویل: ((نن څلورمه ورځ ده چې پرله پسې باران اوري؛ په ځینو سیمو کې سېلابونه راوتلي چې زما په ګډون د ډېرو کلیوالو کرنیزې ځمکې او کورونه یې زیانمن کړي دي.))

باریداد او د دغه ولایت نور اوسېدونکي له چارواکو غوښتنه کوي چې د اورښت او سېلابونو له امله د زیانونو د مخنیوي لپاره اړین ګامونه واخلي.

بلخوا د ترینکوټ ښاروالۍ مرستیال عبدالجلیل وایي، د ورښتونو له پیلېدو سره لاس په کار شوي او په بېلابېلو سیمو کې یې ګڼې کورنۍ د سېلابونو له ګواښونو ژغورلې دي.

هغه زیاته کړه چې له خپلو ټولو وسایلو او امکاناتو سره د خلکو په خدمت کې دي او پر وخت له هغوی سره مرستې ته ځان رسوي.

د هېواد په کچه په یو شمېر ولایتونو کې د واورې او په یو شمېر نورو کې د باران اورېدو لړۍ پيل شوې چې له امله یې په ځینو سیمو کې لارې تړل شوې او په ځینو نورو کې بیا راوتلو سېلابونو مالي او ځاني زیانونه اړولي دي.