کابل (پژواک، ۱۹ مرغومی ۱۴۰۰): چارواکي وايي، استاد فیض الله جلال د خپلو هغو خبرو د وضاحت لپاره نیول شوی چې په ټولنیزو رسنیو کې یې خلک د نظام پر ضد هڅول او د خلکو له عزت سره یې لوبې کولې.
د استاد جلال مېرمنې مسعودې جلال ويلي چې خاوند يې (د کابل پوهنتون استاد فیض الله جلال) تېره ورځ (شنبه) د امنيتي ځواکونو له خوا نيول شوی او نامعلوم لور ته بیول شوی دی.
ځينو امنيتي سرچينو پرون رسنیو ته ويلي وو چې جلال په کابل کې د امنيتي ځواکونو له خوا نيول شوی دی.
د سرچينو په وينا، استاد جلال د ځينو حکومتي بنسټونو د تورنولو په غبرګون کې نيول شوی او اوسمهال د استخباراتو په رياست کې تر پوښتنو لاندې دی.
خو د کورنيو چارو وزارت بيا ویلي وو چې جلال امنيتي ځواکونو نه دی نیولى.
بلخوا د افغانستان سرپرست حکومت وياند ذبيح الله مجاهد پر خپله ټويټرپاڼه ليکلي: «د جلال په نامه یو متعصب انسان د خپلو هغو خبرو د وضاحت لپاره نیول شوی چې په ټولنیزو رسنیو کې یې خلک د نظام پر ضد هڅول او د انسانانو له عزت سره یې لوبې کولې.»
مجاهد وايي: «څو پورې بل څوک د استاد او دانشمند له ادرسه داسې اوتې بوتې ونه وايي او د چا شخصیت او عزت ته زیان ونه رسوي.»
دا په داسې حال کې ده چې څه موده وړاندې فيض الله جلال په يو ټلوېزيوني بحث کې د اسلامي امارت د سياسي دفتر وياند ډاکټر نعيم ته د (ګوساله) خطاب کړى و.
GET IN TOUCH
NEWSLETTER
SUGGEST A STORY
PAJHWOK MOBILE APP