کندهار (پژواک، ۲۰ مرغومی ۱۴۰۰): د کندهار د امنیې قوماندانۍ چارواکي وایي، امنیتي ساتونکو د کندهار د صرافۍ مارکېټ په ساحه کې هغه غله نیولي چې د صرافانو او نورو کسانو له موټرو یې په ډېر مهارت پيسې غلا کولې.
د کندهار د امنیې قوماندانۍ د تحقیقاتو د برخې امر مولوي محمود د دوشنبې په ورځ رسنیو ته وویل، کله چې د خلکو له خوا دوی ته د غلاوو په اړه شکایتونه وشول نو کشفي کسان یې ډېر کړل.
دی وايي، د دغو هڅو په پایله کې یې شپږ غله له ۵،۵ میلیونه کلدارو سره نیولي دي او هڅه کوي چې د دوی نور ملګري هم پيدا کړي.
ده زیاته کړه، دا د غلو یوه ډله ده چې په سازمان شوې توګه غلاوې کوي، لومړی د صراف موټر په نښه کوي او بیا یې موټر په ډېر مهارت پنچروي، وروسته په لار کې پیسې ترې اخلي.
دی وايي، د دې ډلې د نورو کسانو په اړه هم پلټنې روانې دي او یوه غله شاوخوا ۷ میلیونه کلدارې هلمند ته وړې دي چې دوی هڅه کوي هغه پيسې هم ځنې تر لاسه کړي.
د امنیې قوماندانۍ چارواکو هغه پيسې چې له غلو سره یې نیولې وې بېرته هغو کسانو ته وسپارلې چې ترې غلا شوې وې.
یوه کس چې غلو ۲،۵ میلیونه کلدارې ورڅخه وړې وې پژواک ته وویل، له صرافۍ مارکېټ څخه راوتلی و چې غلو یې موټر پنچر کړی و او بیا یې په لار کې پیسې ورڅخه اخیستې وې.
دی له امنیتي مسوولینو مننه کوي چې غله یې ونیول او د ده پيسې یې بېرته ده ته وسپارلې.
دی وایي، پيسې یې خپلې نه وې د بل چا وې چې ده له صرافۍ څخه هغه ته وروړلې، خو اوس چې پیسې يې بېرته تر لاسه کړې دي ډېر خوشحاله دی او له یوه لوی زیان څخه خلاص شوی دی.
د کندهار یو بل صراف حبیب الله هم وايي، په سپین بولدک ولسوالي کې له صرافي څخه د راوتلو پر مهال یې درې میلیونه کلدارې ورڅخه غلا کړې دي.
هغه وايي، له دې پېښې سره سم دوی امنیتي مسوولینو ته خبر ورکړ او وروسته له څو اوونیو دا دی غله نیول شوي او دوی ته خپلې پيسې بېرته وسپارل شوې.
هغه له امنیتي مسوولینو څخه مننه کوي او وايي، د غلو او نورو مجرمینو د نیولو لپاره باید خلک له امنیتي ځواکونو سره همکاري وکړي.
دا په داسې حال کې ده چې په دې وروستیو کې په کندهار کې د نغدو پیسو د غلاوو تر څنګ د موټرسایکلونو او موبایلونو غلاوې هم ډېرې شوې چې خلک یې اندېښمن کړي دي.
Views: 461
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن