کابل (پژواک، ۳ کب ۱۴۰۰): د روسیې ولسمشر ولادیمیرپوتین د اوکراین په ختیځ کې جلا شوې سیمې دونیڅک او لوهانسک یې د خپلواکو دولتونو په توګه په رسمیت پېژندلي او د پوتین دغه پرېکړه ځینو هېوادونو غندلې ده.
د راپورنو له مخې، د روسیې ولسمشر ولادیمیرپوتین د اوکراین په ختیځ کې جلا شوې سیمې دونیڅک او لوهانسک د یوه فرمان په لاسلیک کولو سره د خپلواکو دولتونو په توګه په رسمیت پېژندلې دي.
دا دواړه د روسي پلوه بېلتون پالو تر کنټرول لاندې سیمې دي چې په خپل سر یې له اوکراین خپلواکي اعلان کړې.
د امریکا متحده ایالتونو ولسمشر جوبایډن په دونیڅک او لوهانسک مالي بندیزونه لګولي او امریکا د بهرنیو چارو وزیر انټوني بلنکین د پوتین پرېکړې ته په غبرګون کې په ټویټر کې لیکلي: « دې پرېکړې ته باید چټک او سخت ځواب وویل شي. له خپلو شریکانو سره په همغږۍ به مناسب اقدمات وکړو.»
د جرمني لومړي وزیر اولف شولتز هم په یوه اعلامیه کې ویلي:«دا اقدام به بې ځوابه پاتې نه شي.»
د ملګرو ملتونو سرمنشي انتونیو ګوتریش ویلي چې د روسیې پرېکړه د اوکراین له ځمکنۍ بشپړتیا او خودمختارۍ څخه سرغړونې او د ملګرو ملتونو له منشور سره په ټکر کې ده.
فرانسې بیا د پوتین له پرېکړې څخه وروسته د ملګرو ملتونو د بېړنۍ غونډې غوښتنه کړې.
په داسې حال کې چې د فرانسې هېواد ولسمشر ایمانیول مکرون روسیې او اوکراین ته د کړکېچ د حل لپاره تللی و او لا هم د ستونزې د حل لپاره په دیپلوماسۍ ټینګار کوي، خو د دوشنبې په ورځ یې د روسیې د ولسمشر له پرېکړې څخه وروسته د اروپایي ټولنې له خوا په مسکو د بندیزونو لګول وغوښتل.
بریتانیې هم د روسیې دا اقدام غندلی او د اوکراین له خودمختارۍ څخه یې ښکاره سرغړونه بللې او د بندیزونو غوښتنه یې کړې ده.
د دې هېواد لومړي وزیر بوریس جانسن ویلي: «په اوکراین کې د روسیې د مداخلې یا یرغل په لومړي ګام کې به مضبوط بندیزونه ولګوو.»
په عین وخت کې ناټو بیا ویلي چې روسیه په دې اقدام سره په اوکراین د یرغل لپاره پلمې غواړي.
د دې سازمان مشر ینز سټولټنبرګ په یوې اعلامیې کې ویلي چې د پوتین پرېکړه د اوکراین خودمختاري او ځمکنۍ بشپړتیا لا کمزورې کوي او د شخړې د حل لپاره د هڅو مخکې خنډونه پیدا کوي.
د راپورنو له مخې، لوېدیځوال اندېښمن دي چې روسیه به اوس د بېلتون پالو تر کنټرول لاندې دې سیمو ته خپل پوځیان واستوي، خو داسې ښکاري چې د لوېدیځوالو دا اندېښنه په حقیقت بدلېدونکې ده، ځکه چې د لوهانسک او دونیڅک د خپلواکۍ منلو په اړه د ولسمشر پوتین په فرمان کې راغلي چې روسيې وسله وال ځواکونه به د سوله ساتنې په موخه له اوکراین په جلا شویو دې دوو سیمو کې ځای پرځای شي.
GET IN TOUCH
NEWSLETTER
SUGGEST A STORY
PAJHWOK MOBILE APP