د افغانستان په اړه د ملګرو ملتونو امنیت شورا غونډه سبا جوړېږي

کابل (پژواک، ۱۰ کب ۱۴۰۰): په افغانستان کې د ملګرو ملتونو مرستندوی پلاوی (یوناما) وايي، ټاکل شوې د افغانستان د وضعیت په اړه د ملګرو ملتونو د امنیت شورا غونډه سبا جوړه شي.

په افغانستان کې د ملګرو ملتونو د مرستندوی پلاوي (یوناما) پر رسمي فېسبوک پاڼه نن په خپره شوې خبرپاڼه کې راغلي چې د ملګرو ملتونو د سرمنشي ځانګړی استازی «دیبرالاینز» به هم په دې اړه د ناستې د یوې برخې په توګه خپل راپور امنیت شورا ته وړاندې کړي.

سرچينه ليکي، دغه غونډه سبا (د کب ۱۱مه) چې د مارچ له دویمې سره برابره ده، د نیویارک پر وخت د ماښام ۷ بجې او د افغانستان پر وخت د ورځې لس بجې پیلېږي.

د افغانستان د وضعیت په اړه د ملګرو ملتونو امنیت شورا یوه غونډه د سلواغې په پنځمه ترسره شوه چې په کې د د ملګرو ملتونو سرمنشي «انتونیو ګوتیریش» او د افغانستان لپاره د ملګرو ملتونو ځانګړې استازې دیبرا لاینز او همدارنګه د ناروې د بهرنیو چارو وزیر «اینکېن هویتفېلټ» امنیت شورا ته معلومات وړاندې کړل.