جلال اباد (پژواک، ۱۹ کب ۱۴۰۰): د کډوالو چارو وزارت چارواکي وايي، تېرو څو مياشتو کې څه باندې ۵۰۰زره افغانان بېرته خپل هېواد ته راستانه شوي خو وايي، لا هم د بهرنيو کړيو د ناسمو تبلغاتو له امله په دعوتنامو باندې يو شمېر هېوادوال په دغه موده کې بهر ته وتلي دي.
د کډوالو چارو وزارت يوه لوړپوړي پلاوي د کب په ۱۹مه تر غرمې وروسته د ننګرهار ولايت اړوند تورخم ښارګوټي ته د رسمي سفر پرمهال دغه څرګندونې کړې دي.
په دغه سفر کې د کډوالو او بېرته راستنېدونکو چارو وزارت مسوولينو تورخم ښارګوټي کې پاکستان ته د تلونکو مسافرو د ستونزو په تړاو هم پلټنه وکړه او دغه راز يې بېرته راستنېدونکو کډوالو ته د موجوده خدماتو څارنه هم ترسره کړه.
بل پلو لا هم په تورخم کې پاکستان ته تلونکي مسافر تورخم دروازه د اوښتو راوښتو پرمهال له موجوده ستونزو شکايت کوي.
تورخم ته د سفر پرمهال کډوالو او بېرته راستنېدونکو چارو وزارت مرستيال محمد ارسلا خروټي وويل، د سفر موخه يې په تورخم کې د دوی د وزارت اړونده ځايي مسوولينو سره ليدل او د چارو ارزونه ده.
د خروټي په خبره، د سرپرست حکومت له رامنځ ته کېدو وروسته له بېلابېلو هېوادونو ۵۵۰زره افغان کډوال بېرته هېواد ته راستانه شوي دي.
دی له افغانستان څخه د ګڼو خلکو د وتلو خبره د بهرنيو کړيو ناسم تبليغات بولي او زياتوي چې يو کم شمېر خلک د بهرنيانو په دعوتنامو له هېواده وتلي دي.
د کډوالو او بېرته راستنېدونکو چارو وزارت مرستيال وويل، په بېلابېلو هېوادونو کې په بند خونو کې د بندي افغانانو د خوشې کولو په پار يې هم هڅې پيل کړې دي.
بل پلو په تورخم دروازه اوښتونکي مسافر لا هم د پاکستان لوري ته په اوښتو را اوښتو کې د ستونزو ياده کوي.
نقيب الله چې پېښور ته د درملنې لپاره خپل ناروغ وړي، وايي، ګڼه ګوڼه دومره زياته ده چې د سهار له اتو بجو څخه د غرمې تر دولسو بجو يې تګ ته انتظار کړی دی.
يو بل مسافر محمد ويس وويل، نوی حکومت بايد پاکستاني چارواکو سره خبرې وکړي چې تورخم دروازه کې مسافرو ته د تګ راتګ پرمهال ستونزې کمې او اسانتياوې زياتې کړي.
تورخم له پاکستان سره په ډيورنډ کرښه پرته هغه دروازه ده چې تل د مسافرو د تګ راتګ پرمهال د شکايتونو او ستونزو سره مخامخ وي.
GET IN TOUCH
NEWSLETTER
SUGGEST A STORY
PAJHWOK MOBILE APP