د پکتيا په مرکز او درېيو ولسواليو کې د پاکو اوبو رسولو پروګرام پيل شو

ګردېز (پژواک، ۲۲ وری۱۴۰۱): د پکتيا په مرکز او درېيو ولسواليو کې وچکالۍ ځپلو سيمو لپاره د پاکو اوبو رسولو او حفظ الصحې پروګرام پيل شو.

دغه پروګرام د ياد ولايت د کليو پراختيا او بيارغونې رياست په چوکاټ کې د «IRC» نړيوالې موسسې په مالي ملاتړ تطبيقيږي.

د پکتيا د کليو پراختيا او بيارغونې رييس مولوي ميرزاخان صادق پژواک ته وويل: ((په دې پروګرام کې د اوبو رسونې د ۴۰ نويو څاګانو وهل، د ۶۰ څاګانو بيا رغول، د اوبو رسونې د ۵ شبکو جوړول او د ۱۲۷۵ روغتيايي بستو وېشل شامل دي.))

نوموړي زياته کړه، دغه پروګرام په مرکز ګردېز، احمدابا، څمکنيو او زرمت ولسواليو کې پلی کېږي او موخه يې په وچکالۍ ځپلو سيمو کې د څښاک پاکو اوبو برابرول او د دې برخې بيارغول دي.

صادق وویل، په دې ورستيو کې د وچکالۍ له امله د ډېرو سيمو د څاګانو اوبه ښکته تللې دي او ځينو سيمو کې د څښاک پاکې اوبه په ډېرې ستونزې پيدا کېږي چې د دا ډول پروګرامونو په پلي کېدا سره به  پاکو اوبو ته د خلکو لاسرسی اسانه شي.

د ده په خبره، د دغه پروګرام مالي لګښت ۸.۵ ميليونه افغانۍ کېږي چې د شپږو مياشتو په موده کې به بشپړ شي.

د پکتيا اوسيدونکي د ياد پروګرام پر پيلېدو خوښ دي.

د زرمت ولسوالۍ اوسېدونکی حاجي معراج وايي، په دې ورستيو کې په څاګانو کې د څښاک اوبه ښکته روانې دي؛ چې له امله يې ډېر خلک دې ته اړ شوي چې يا نوې څاګانې ووهي يا هم زړې څاګانې نورې هم ژورې کړي.