د دايکنډي مستوفيت په تېرو درېيو مياشتو کې ٤٢ ميليونه افغانۍ عوايد ترلاسه کړي

نيلي (پژواک، ٢٦ ورى ١٤٠١): د دايکنډي سيمه ييز مسوولين وايي، د تېر کال په وروستيو درېيو مياشتو کې د دغه ولايت مستوفيت ٤٢ ميليونه افغانۍ عوايد راټول کړي دي.

د دايکنډي ولايت مقام د يوې خبرپاڼې په خپرولو سره ويلي چې د ١٤٠٠لمریز کال د ژمي په وروستيو درېيو مياشتو کې ددغه ولايت مستوفيت ٤٢ ميليونه افغانۍ عواید ترلاسه کړي دي.

دغه موضوع د دايکنډي ولايت مقام په عمومي غونډه کې مطرح شوې او د عوايدو راټولولو د لارو چارو په اړه څه نه دي ويل شوي؛ خو د ترلاسه شوو معلوماتو له مخې، دغه عوايد له دولتي ادارو، خصوصي سکټور، خلکو او هټۍوالو څخه ترلاسه شوي دي.

په دې خبرپاڼه کې ټينګار شوى چې دولتي ادارې او نور کسان بايد په ټاکلي وخت خپله ماليه تحويل کړي.