اسعداباد(پژواک، ۲۹ وری ۱۴۰۱): د کونړ د ولايتي روغتون مسوولين وايي، د دغه روغتون ودانۍ معياري نه ده او کافي طبي پرسونل هم نه لري.
د کونړ مرکز اسعداباد ولایتي روغتون رييس ډاکټر عطاءالله ساپي پژواک خبري آژانس ته وويل چې د ياد روغتون اوسنۍ ودانۍ د سردار محمد داوود خان د واکمنۍ پرمهال جوړه شوې او ډېره زړه ده.
ده زياته کړه: «ياد روغتون ته نه یوازې له کونړ، بلکې له مرکزي او ختیځ نورستانه هم د درملنې لپاره ناروغان راځي.»
هغه وويل، دغه روغتون د ۱۵۰ ناروغانو د بستر وړتيا لري؛ خو اوس د مجبوريت له مخې پکې ۲۵۰ ناروغان بسترېږي.
ساپي وویل: «زموږ د روغتون ودانۍ لسګونه کلونه پخوا جوړه شوې او زړه ده. د تېر حکومت پرمهال پکې یو څه د رغونې چارې ترسره شوې، خو د ناروغانو شمېر ته په پام سره کافي نه ده.»
نوموړي دغه راز وويل چې کابو شپږ کاله وړاندې په اسعداباد کې د ۳۴۷ میلیون افغانيو په ارزښت د ۲۰۰بستريز روغتيايي کمپلېکس د جوړېدو کار پيل شو؛ خو بشپړ شوی نه دی.
عام خلک هم وايي چې د اسعداباد روغتون ودانۍ کوچنۍ ده او د ناروغانو د پيوازانو لپاره هېڅ ځای نه لري.
د دغه ولايت د نرنګ ولسوالۍ اوسېدونکي برکت الله پژواک ته وويل چې د اسعداباد په ولایتي روغتون کې د ناروغانو د پېوازانو لپاره انتظار خونه نشته او د خلکو ستونزو ته پام نه کېږي.
نوموړي وويل: «دوه ورځې کېږي چې ناروغ مې په ولایتي روغتون کې بستر دی، زموږ لپاره د انتظار مناسب ځای نشته او ټوله شپه مې د سړک پرغاړه تېره کړې.»
د اسعداباد يو بل اوسېدونکی قیام الدین بیا وایي چې حکومت باید په دغه ولایت کې د ۲۰۰ بستریز روغتیایي کمپلېکس نیمګړې چارې ژر بشپړې کړي.
هغه وایي، د اسعداباد ولایتي روغتون کې د ډیرې ګڼې ګوڼې له امله روغتیا پالان نه شي کولای په سمه توګه د ناروغانو درملنه وکړي.
په ورته مهال د کونړ عامې روغتیا رییس قاري مظفر مخلص بیا وایي چې د روغتیایي کمپلېکس د ودانیو ۷۰ سلنه چارې بشپړې شوې دي .
د هغه په خبره د عامې روغتیا وزارت له مشرتابه سره یې د کمپلېکس د نیمګړو چارو بشپړولو په اړه خبرې کړې دي او پر وینا یي چې تمه شته ژر به یې د رغونې پاتې چارې هم بشپړې شي .
Views: 33
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن