مجاهد د عبدالرووف د ژغورنې عملیاتو کې د یو شمېر تښتوونکو وژل کېدو او نیول کېدو خبر ورکوي

کابل (پژواک، ۴ غویی ۱۴۰۱): افغان چارواکي وايي، د بلخ په مرکز مزارشریف کې د تښتول شوي ماشوم عبدالرووف د ژغورنې په شل ورځنیو عملياتو کې يو شمېر تښتوونکي وژل شوي او ځيني نیول شوي دي.

یوولس کلن عبدالرووف نږدې دوه کاله مخکې د ۱۳۹۹ کال د لړم په لسمه د بلخ له مرکز مزارشریف ښار څخه ناپېژاندو کسانو وتښتاوه؛ دغه ماشوم هغه مهال نهه کلن و.

عبدالرووف د تښتوونکو له بنده راخوشی شو او پرون چارواکو په بلخ کې خپلې کورنۍ ته وسپاره.

د اسلامي امارت ویاند وياند ذبيح الله مجاهد پر خپل ټويټر ليکلي چې د بلخ په مرکز مزارشريف ښار کې د تښتول شوي ماشوم عبدالرووف د ژغورلو لپاره له څه باندې شلو ورځو راهيسې د ژغورنې عملياتو روان وو.

هغه تېره شپه لیکلي: «بالاخره تېره (وړمه) شپه د يو شمېر اختطافګرو له وژلو او يو شمېر نورو له نيولو وروسته عبدالرووف ژوندی‌ وژغورل شو. د پلټنې او مجرمينو د نيولو عمليات لا هم دوام لري چې د عملياتو له پای ته رسېدو سره به د دې بوږنوونکې پېښې عاملين افشا او د اسلامي شريعت منګولو ته به وسپارل شي، ان شاءالله.»

د عبدالرووف پلار حاجي محمد نبي د امنیتي او کشفي ارګانونو له هڅو مننه کړې، ویلي یې دي چې زوی یې دوه کاله وړاندې وتښتول شو، خو انسان تښتوونکو د دغه ماشوم د خلاصون په بدل کې په زياته اندازه پیسې غوښتې چې هغه یې د ورکولو توان نه درلود.