ټام ویسټ له ډاکټر عبدالله او شهرزاد اکبر سره پر ملي سیاسي مذاکراتو خبرې کړې دي

[restrict paid="true"]

کابل (پژواک، ۱۶ غویی ۱۴۰۱): د افغانستان لپاره د امریکا ځانګړي استازي ټام ویسټ ډاکټر عبدالله او شهرزاد اکبر سره پر ملي سیاسي مذاکراتو خبرې کړې دي.

ویسټ په خپله ټویټرپاڼه کې لیکلي چې د ملي روغې جوړې عالي شورا له پخواني مشر ډاکټر عبدالله عبدالله سره یې ټیلیفوني خبرې کړې دي.

هغه پر دې خوښي څرګنده کړې چې ډاکټر عبدالله د کوچني اختر په ورځو کې له افغانستانه بهر ولاړ او رخصتۍ یې له خپلې کورنۍ سره تېرې کړې.

د امریکا ځانګړي استازي ویلي، له ډاکټر عبدالله سره یې د سیاسي ملي مذاکراتو بحث وکړ او د نړیوالې ټولنې پر ښکېلتیا او مرستو یې هم خپل نظرونه شریک کړل.

ویسټ وایي: ((د ډاکټر عبدالله مشورو ته ډېر ارزښت ورکوم.))

بلخوا، نوموړي په یوه بل ټویټ کې لیکلي چې د افغانستان د بشر حقونو پخوانۍ مشرې مېرمن شهرزاد اکبر سره یې هم خبرې کړې او پر هزاره وګړو وروستي ترهګریز بریدونه یې وغندل .

هغه زیاته کړې چې له نوموړې سره یې هم د ملي سیاسي مذاکراتو پر پیلېدا ټینګار وکړ .

ټام ویسټ د افغانستان په بېلا بېلو سیمو کې د خلکو له خوا د نجونو د ښوونځیو د بیا پرانيستلو د غوښتنو هرکلی هم کړی دی.

[/restrict]