کابل (پژواک، ۲۳ غویی ۱۴۰۱) : د افغانستان سرپرست حکومت او سیاسي مشرانو د اماراتو د ولسمشر شیخ خلیفه بن زاید النهیان پر مړینې خواشیني ښودلې ده.
شیخ زاید د غویي په ۲۳مه، د ۷۳ کلونو په عمر د ورپيښې ناروغۍ له امله مړ شو، د اماراتو حکومت په دغه هیواد کې تر ۴۰ ورځو پورې ملي ماتم اعلان کړی دی.
د افغانستان د سرپرست حکومت د بهرنیو چارو وزارت لخوا په یوه خپره شوې خبرپاڼه کې د نوموړي په مړینه خواشیني څرګنده شوې ده.
سرچینې زیاته کړې : “موږ د مرحوم درنې کورنۍ او د متحده عربي اماراتو ولس ته د تسليت ترڅنګ د جميل صبر او عظیم اجر دعاء کوو، الله جل جلاله دې له مرحوم سره د احسان معامله وکړي، کورنۍ او ولس دې مصيبت کي مأجور او په نعم البدل سرفرازه کړي.”
خلیفه بن زاید په ۱۹۴۸ میلادي کال کې زیږیدلی و او د ۲۰۱۴ کال راهیسې د مغزي سکتې له امله د هیواد د چارو له پرمخ بیولو څخه ګوښه شو او په عام محضر کې یې له څرګندیدو هم ډډه کړې وه.
ددې هیواد د اساسي قانون له مخې د ولسمشر مرستیال او صدراعظم شیخ محمد بن راشد آل مکتوم، چې د دوبۍ حاکم دی د اوو حاکمانو فدرالي عالي شورا د جوړیدو او د نوي ولسمشر تر ټاکل کیدو د متحده عربي اماراتو چارې پرمخ بیایي.
