کابل (پژواک، ۳۱ غویی ۱۴۰۱): د ماشومانو لپاره د ملګرو ملتونو د ملاتړ ادارې (یونیسف) مرستیالې، د پوهنې له سرپرست وزیر سره د لیدنې پر مهال ویلي، په پام کي لري چې افغانستان کې پنځه زره نور سیمهییز ټولګي جوړ کړي.
د پوهنې وزارت په خبرپاڼه کې راغلي چې د دغه وزارت سرپرست وزیر شیخ مولوي نورالله منیر، د ماشومانو لپاره د ملګرو ملتونو د ملاتړ ادارې (یونیسف) له مرستیالې حنان سلیمان او ورسره مل پلاوي سره لیدلي دي.
سرچینې لیکلي چې د یونیسف مرستیالې په دغه لیدنه کې د افغانستان له ښوونیز نظام د بشپړ ملاتړ لپاره خپله ژمنتیا بیا تکرار کړه او ویې ویل چې دغه اداره دا مهال په افغانستان کې نږدې نهه زره سیمهییز درسي ټولګي لري.
د هغې په وینا، یونیسف په پام کې لري چې په راتلونکې کې په افغانستان کې پنځه زره نور سیمهییز ټولګي هم جوړ کړي.
د پوهنې سرپرست وزیر هم د افغانستان په تعلیمي ډګر کې د یونیسف هلې ځلې ستایلې او ویلي یې دي چې د یاد بنسټ ټول ښوونیز پروګرامونه په تېره بیا سیمهییز درسي ټولګي، د تعلیمي چوپړ یوه غوره او اغېزناکه بڼه ده.
ده ویلي، د پوهنې وزارت د کمیت او کیفیت له پلوه د یادو ټولګیو د لا پیاوړتیا لپاره له یونیسف سره په ګډه کار کوي.
Views: 58
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن