فاریاب کې د ترافیکي پېښې له امله پنځو کسانو ته مرګ ژوبله اوښتې ده

میمنه (پژواک، ۴ غبرګولی ۱۴۰۱): د فاریاب سیمه ییز چارواکي وایي چې په یاد ولایت کې د یوې ترافیکي پېښې له امله دوه کسان مړه او درې نور ټپيان دي.

د فاریاب د اطلاعاتو او کلتور رییس مولوي شمس الله محمدي پژواک خبري اژانس ته وویل، یاده پېښه تېر مازدیګر هغه مهال وشوه چې یو فيلډر موټر د قیصار ولسوالۍ په ارضلیک سیمه کې له سړکه ووت او چپه شو.

نوموړی وایي چې په دې پېښه کې دوه سړي مړه شوي او درې ښځې ټپيانې شوې دي.

محمدي د یاد موټر د چپه کېدو لامل د ارضلیک کلي د لارې خرابوالی ښودلی دی.