لښکرګاه (پژواک، ۱۴ غبرګولی ۱۴۰۱): د هلمند ولایت حکومتي مسوولین خبر ورکوي چې په باباجي ولسوالۍ کې د ترافیکي پېښې له امله اوو کسانو ته مرګ ژوبله اوښتې ده.
د دغه ولایت د اطلاعاتو او کلتور ریاست مرستیال مولوي محمد قاسم ریاض د غبرګولي په ۱۴مه پژواک خبري اژانس ته وویل چې نن سهار شاوخوا شپږ ۶ بجې د باباجي ولسوالۍ د محمداباد په سیمه کې ترافیکي پېښه شوې وه.
نوموړي زیاته کړه چې په یاده سیمه کې کرولا او موټرسایکل ټکر کړی چې له امله یې یوه ښځه مړه، څلور ښځې او دوه سړي ټپیان شوي دي.
ریاض وایي چې ټپیان د امنیتي ځواکونو له خوا د لښکرګاه او کندهار ولایت روغتونونو ته لېږدول شوي دي.
د یادونې ده، په دې وروستیو کې په هلمند کې ترافیکي پېښې ډېرې شوې دي.
GET IN TOUCH
NEWSLETTER
SUGGEST A STORY
PAJHWOK MOBILE APP