حکمتیار حکومت ته: مه پرېږدئ چې څوک ځانونه فاتحان او ولس اسیر وبولي

کابل (پژواک، ۱۴ غبرګولی ۱۴۰۱): حکمتیار، د بحران د ډاډمن حل لپاره په پرېکړو کې د ملت پر ونډه ټینګار کوي، سرپرست حکومت ته په خطاب کې وایي: «مه پرېږدئ څوك داسې وانګېري چې دا هېواد دوى فتح كړى او د دې هېواد ولس د هغوى اسيران دي؛ بې‌ځايه غرور، نظامونه نسكوروي.»

د حزب اسلامي مشر ګلبدین حکمتیار تېره ورځ د جمعې لمانځه د خطبې پر مهال ویلي چې د هر نظام بقاء او دوام په دې پوري تړلې ده چې ملت یې تر شا ولاړ وي؛ له تصرفاتو، پرېكړو او کړنو یې راضي وي.

ده ویلي: «د يوه نظام د نسكورېدو لړۍ هغه مهال پيل شي چي واكمن یې مغرور شي، خداى هېر كړي، ولس ته شا كړي، خپل شعارونه او آرمانونه پرېږدي، د شتمنيو په راغونډولو بوخت شي، د واكمنو او ولس ترمنځ حجابونه، واټنونه، توپيرونه او نارضايتي رامنځته شي؛ ولس داسې وانګېري چې واكمن ورسره د ورور په څېر نه، بلكې د مفتوحه هېواد د اسيرانو په څېر چلن كوي، قانون ته تر پښو لاندې كوي، خپلسرۍ ته مخه كړي، وړوكى افسر او مأمور به یې په خپلې سيمې او اداره كي داسې وي لكه چې هم امير وي، هم صدراعظم، هم مفتي، قاضي، څارنوال، جلاد او د زندان مدير؛ پر خپل سر تړل، نيول، وهل او وژل كولى شي او ملت احساس كړي چي په تصميمونو كې شريك نه دی او هر څه د واكمنو له لوري پرې تحميلېږي.»

سرپرست حکومت ته مشورې:

حکمتیار وایي: «امارت اسلامي ته په داسې حال كې سپارښتني لرو او مشورې وركوو چي د دوى بريا خپله بريا او ناكامي او بدنامي یې د ځان او ټولو اسلامپالو ناكامي او بدنامي ګڼو، په حكومت كې د مشاركت تمه او غوښتنه نه ترې لرو، د ګواښونو پر وړاندې یې مرستې او ملګرتيا ته چمتو يو؛ ولس ته وايو، پر ناخوالو صبر وكړئ؛ د داسې څه له ويلو او كولو ډډه وكړئ چي ګټه یې ډېر خطرناك كورني او بهرني دښمن ته رسېږي.»

دی د افغانستان له سرپرست حکومته غواړي چې له بحرانه د وتلو لپاره جامع، د افغان ولس اكثريت ته د منلو وړ، معقوله، عملي او رغنده طرحه وړاندې كړي او ملت د ملي مسايلو اړوند په هر تصميم كې شريك كړي.

هغه حکومت ته په خطاب کې زیاتوي: «خپل صفوف له هغو تصفيه كړئ چې مؤيد پر مخالف؛ دوست پر دښمن بدلوي او اغيارو ته پر يارانو ترجيح وركوي، د حكومت او ولس ترمنځ واټن او حتى دښمني او مخالفت رامنځته كوي او هغه چې له حكومتي واكه غلطه استفاده كوي او خپل شخصي، قومي، فكري او مذهبي رقابتونه پالي.»

حکمتیار د کومې سیمې نوم نه اخلي، خو وایي: «حساسو سيمو ته د زياتو جنګياليو لېږل اكثراً د ګټې پر ځاى تاوان لري؛ كه څه هم كله كله مثبت نتایج پرې مرتب كېږي. په جنګي سيمه كې زيات جنګيالي اداره كول ګران كار وي؛ د دې پر ځاى د سيمې له مخلصينو كار واخلئ؛ اعتماد پرې وكړئ؛ د سيمې امنيتي چارې هغوى ته وسپارئ. د داسې مؤمنو افغانانو شمېر په هرې سيمه كې ډېر زيات دی چې اسلام ته ژمن دي؛ د اشغالګرانو په خلاف جنګېدلي؛ په جنګي سيمو كې هم او په شاوخوا سيمو كي یې هم.»

دی حکومت ته د خپلو مشورو په دوام وایي: «دهغو د راضي كولو ډېره هڅه مه كوئ چې پرون په واك كې وو او د فسادونو پېړې دوسيې لري، د كور دننه عام ولس راضي كړئ؛ كه یې راولئ نو له دې شرط سره یې راولئ چې د ملي او شخصي شتمنيو د غصب، تالان او د قتلونو دوسيې به یې د شريعت په رڼا كې څېړل كېږي.»

د هغه په وینا، د افغانستان بحران ژورې ریښې لري؛ ډېر كورني او بحرني لوري په كې دخيل دي؛ ډېرو ځواكمنو او شتمنو سيمه‌یيزو او نړۍوالو ځواكونو خپلې ګټې په افغانستان كې له ناامنيو، شخړو او جګړو سره غوټه كړې؛ نه غواړي افغانستان كې ثبات او امنيت راشي او افغانان يو ځواكمن مركزي حكومت ولري؛ د افغانستان وېش، تجزيه او بې‌ثباتي خوښوي او په همدې كې خپلي ګټي لټوي.

د حزب اسلامي مشر وایي: «راشئ ژور فكر وكړو او د بحران ډاډمنه حل لار ولټوو؛ سينه پراخه كړئ؛ ملت په تصميم كي شريك كړئ، دې ملت د اسلام او ازادۍ لپاره ډېري قربانۍ وركړې؛ د هېواد اصلي وارثان دوى دي؛ د دوى له ملګرتیا پرته هيچا د څه كولو توان نه درلود؛ چا چې څه كړي نو د ملت په مرسته او ملګرتيا یې كړي؛ اصلي فاتحان دوى دي، مه پرېږدئ څوك داسې وانګېري چي دا هېواد دوى فتح كړى او د دې هېواد ولس د هغوى اسيران دي؛ بې‌ځايه غرور نظامونه نسكوروي.»

ده تېره جمعه هم ویلي وو چې د هېواد ترینګلی وضعیت يوې درنې او د ملت ممثلې شورا ته اړتیا لري؛ او همدا کولی شي د ټولو ملي مسایلو په اړه داسې پرېکړې وکړي چې د ملت غوڅ اكثريت به یې تر شا ولاړ وي.

حجاب

ګلبدین حکمتیار پرون په خطبه کې ویلي چې افغانانو هم اسلام په خپله خوښه غوره كړى او هم حنفي مذهب؛ نه دین په زور پرې تحميل شوى او نه مذهب.

د هغه په وینا، په زور تحميل شوى دين او مذهب تر هغه وي چي زور یې تر شا وي؛ خو چي زور پاى ته ورسېږي؛ نو خلك هم تحميلي دين شا ته غورځوي او هم مذهب او پر هغو عمل نه کوي.

دی زیاتوي: «د امارت اسلامي مسوولينو ته سپارښتنه كوو چي مه داسې خاص ډول جامه پر افغانانو مخصوصاً مېرمنو او نجونو تحميلوئ چې نه په قران او سنت كې د هغې په اړه صريح نص شته او نه یې د وجوب او تحريم په اړه كوم امر او نهي او نه د احنافو د ائمه وو، فقهاوو، علماوو او مفسرينو په آراء او اقوالو كي كومه سپارښتنه او وينا؛ د احنافو په وړاندينيو ټولو علماوو كې پر دې شبه اجماع ده چي د مېرمنو مخ، لاسونه او پښې په عوراتو كې شامل نه دي او پر دې هم اجماع ده چې په حج كې به محرمې مېرمنې نه مخ پټوي او نه لاسونه؛ يوازې د ګوتو په شمېر متأخرينو؛ د سلف او متقدمينو د مسلمې رایې او فتوى په خلاف ويلي چې د فتنې د احتمال له كبله مخ پټول افضل او حتى واجب دي؛ ولې د داسې شان رایې له كبله نجونې له خپل مسلم حق، تعليم څخه محرومي كړاى شي!؟.»

د حزب اسلامي مشر د افغانستان سرپرست حکومت ته په اشاره ویلي: «لطفاً دا ستونزه حل كړئ؛ د افغان ولس نږدې نيمايي نفوس په داسې څه مه ګومارئ چي نه الله تعالى پرې ګومارلي، نه رسول الله (ص) او نه د احنافو د مذهب ائمه او فقهاوو د هغه د وجوب او لزوم خبره كړې.»

د امر بالمعروف، نهې ‌عن‌المنکر او شکایتونو اورېدو وزارت د غویي په ۱۷مه د شرعي حجاب په تړاو یوه توضیحي او تطبیقي طرحه اعلان کړه.

په دې طرحه کې د حجاب د تعریف په اړه راغلي: «بدن چې په هر ډول جامو پټ شي، حجاب ورته ویل کېږي؛ خو باید دومره نری نه وي چې بدن ترې ښکاره شي او نه هم دومره چسپ وي چې د بدن د غړو نماینده‌ګي وکړي.»

په یاده طرحه کې راغلي چې څادري له اوږدې مودې راهیسې د افغاني کلتور یوه باعزته برخه او د حجاب تر ټولو غوره بڼه ده.

دغه راز د غویي په ۲۹مه د امر بالمعروف او نهي عن‌المنکر وزارت، له انځوریزو رسنیو غوښتي وو چې د حجاب په اړه له مخکې اعلان شوې طرحې سره سم دې ښځینه ویاندویانې د خپرونو وړاندې کولو پر مهال له سترګو پرته نور مخ پټ کړي.