مجاهد: هغه موټر او اجناس چې اسناد ولري بېرته خپلو مالکینو ته سپارل کېږي

کابل (پژواک، ۲۰ غبرګولی ۱۴۰۱): د افغانستان سرپرست حکومت وایي، هغو کسانو ته چې د خپلو نقلیه وسایطو او اجناسو اسناد ولري، بېرته ورکول کېږي.

د سرپرست حکومت ویاند ذبیح الله مجاهد په خپله ټویټرپاڼه کې په دې اړه د امنیتي او تصفیوي چارو د لوی کمېسیون خبرتیا خپره کړې ده.

https://twitter.com/Zabehulah_M33/status/1534953284410167301?s=20&t=QRIbaDGM7uMgFR32JlzSJg

په خبرتیا کې راغلي، په تېرو میاشتو کې په کابل کې په تصفیوي عملیاتو کې د نیول شوو نقلیه وسایطو او نورو اجناسو په اړه که هر څوک یې د ملکیت ادعا لري، خبر ورکول کېږي چې د غبرګولي تر ۲۳مې نېټې پورې د دارلامان لوا درېیم کنډک کې د معتمدینو کمېسیون ته مراجعه وکړي.

سرچینې زیاته کړې چې دغه کمېسیون هلته د یوولسو ورځو لپاره حضور لري، مدعي شخص دې په خپل مدعي‌بها مال باندې د خپل ملکیت ټول مثبت اسناد حاضر کړي، که د اعتبار وړ وګڼل شول؛ نو نقلیه وسایط مالک ته په تضمین سره سپارل کېږي.

د یادونې ده، تېر کال د کابل له سقوط وروسته د نوي سرپرست حکومت له خوا له دولتي ادارو وسایط او نور توکي ضبط کړي وو او د ځینو خلکو له کورونو یې هم دولتي او شخصي وسایط راټول کړي وو.