کابل (پژواک، ۲۳ غبرګولی ۱۴۰۱): اقتصادي کمېسیون، د معیاري ځمکني ترانسپورټي سیستم د رامنځته کولو داسې یوه طرحه د شپږو میاشتو لپاره په ازمایښتي ډول تایید کړه چې له مخې به یې د کال ۳۰ میلیارده افغانۍ عواید راټولېږي.
دغه څرګندونې د افغانستان د ریاستالوزرا د اقتصادي مرستیال ملا عبدالغني برادر دفتر له خوا رسنیو ته په استولې خبرپاڼه کې شوې دي.
سرچینې لیکلي، د اقتصادي کمېسیون په ۲۳مه نوبتي غونډه کې د ترانسپورټي ستونزو د حل په موخه د ترانسپورټي چارو د تنظیم کمېسیون له لوري پر جوړې شوې طرحې او وړاندیزونو بحث وشو.
د خبرپاڼې له مخې، اقتصادي کمېسیون په افغانستان کې د معیاري ځمکني ترانسپورټي سیستم د رامنځته کولو او ترانسپورټي ستونزو د حل په موخه په لسو مادو کې د دغه کمېسیون وړاندې شوې طرحه د شپږو میاشتو لپاره په ازمایښتي ډول تایید کړه.
د سرچینې په وینا، د دغې طرحې لسمه ماده (په سرحدي بندرونو کې د باروړونکو موټرو د نوبت د بهیر تنظیم) له تاییده مستثنی ده.
په خبرپاڼه کې راغلي چې د دغې طرحې له عملي کېدو سره به په کلني ډول د دولت خزانې ته نږدې ۳۰ میلیارده افغانۍ عواید راټول شي.
سرچینې د دغې طرحې په اړه نور جزئیات نه دي ورکړي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن