کرزي او د ترکیې سفیر افغانستان کې د دایمي سولې او ثبات لپاره پر خبرو‌ ټینګار کړی

کابل (پژواک، ۲۳ غبرګولی ۱۴۰۱): د افغانستان پخواني ولسمشر حامد کرزي او په کابل کې د ترکیې سفیر افغانستان کې د دایمي سولې او ثبات د ټینګښت لپاره د خبرو‌ اترو پر اړتیا ټینګار کړی دی.

د پخواني ولسمشر حامد کرزي دفتر په خبرپاڼه کې راغلي چې کرزي په کابل کې د ترکیې له سفیر جهاد ارگینای سره لیدلي دي.

سرچینه وايي، په دې کتنه کې د افغانستان او سیمې پر روانو حالاتو نظرونه تبادله شوي او د افغانستان او ترکیې د تاریخي او دوستانه اړیکو او همکاریو په باب هم خبرې شوې دي.

د سرچینې په وینا، حامد کرزي د افغانستان له خلکو سره د ترکیې له همکاریو په ځانګړې توګه افغان ځوانانو ته د زده‌کرې زمینې د برابرولو او د تحصیلې بورسونو له ورکړې مننه کړې او د دواړو هېوادونو ترمنځ د اړیکو او همکاریو د لا پراختیا هیله یې څرګنده کړې ده.

دغه راز سرچینې زیاته کړې چې دواړو خواوو په افغانستان کې د دایمي سولې او ثبات د تامین لپاره د خبرو‌ اترو پر اړتیا ټینګار کړی دی.