کابل کې پر درمسال د برید مسوولیت داعش ډلې پر غاړه اخیستی

کابل (پژواک، ۲۹ غبرګولی ۱۴۰۱): د کابل ښار په کارته ‌پروان کې د سکانو پر درمسال د برید مسووليت داعش ډلې پر غاړه اخيستی دی.

د راپورونو له مخې، تېره ورځ سهار شاوخوا شپږنیمې بجې وسله‌وال کسان د کابل ښار په کارته پروان سیمه کې پر ساتونکو د لاسي بم له برید وروسته د سیکانو درمسال ته ننوتل.

سرچينه زياتوي چې په دغه برید کې د درېیو بریدګرو په ګډون ۵ کسان وژل شوي او ۷ نور ټپیان دي؛ په وژل شوو کې یو امنیتي کس او یو اهل هنود شامل دي او ټپي شوي اووه کسان هم اهل هنود دي.

د رویټرز خبري اژانس د راپور له مخې، د اسلامي دولت یا داعش ډلې ادعا کړې چې په کابل کې د اهل هنودو پر معبد برید دوی کړی؛ دوه کسان یې په کې وژلي او ۷ نور یې ټپيان کړي دي.

په راپور کې راغلي، د داعش خراسان څانګې په ټیلګرام کې ادعا کړې چې دغه برید یې د اسلام پیغمبر حضرت محمد (ص) ته د سپکاوي په غبرګون کې کړی او داسې معلومېږي چې اشاره یې د هند د حکومت د یوې ویاندې څرګندونو ته وه چې ګڼ شمېر اسلامي هېوادونو غندلې دي.

پر یاد درمسال برید په کور دننه او بهر پر سختو ټکو غندل شوی دی.