د هلمند سيند کې د ډوب شوو درېيو کسانو مړي موندل شوي

[restrict paid="true"]

لښکرګاه (پژواک، ٣٠ غبرګولى ۱۴۰۱): د هلمند حکومتي مسوولين وايي، د دغه ولایت د ګرشک ولسوالۍ مربوطاتو کې د درېیو هغو کسانو مړي چې د لامبلو پر مهال اوبو ډوب کړي وو، موندل شوي دي.

د هلمند د اطلاعاتو او فرهنګ رياست مرستيال مولوي محمد‌قاسم رياض د غبرګولي په ٣٠مه پژواک خبري اژانس ته وويل چې تېره ورځ د ګرشک ولسوالۍ په مربوطاتو کې درې کسان د لامبو وهلو پر مهال اوبو ډوب کړي وو.

هغه وايي، د يادو کسانو مړي نن موندل شوي او خپلو کورنيو ته یې سپارلي دي.

هغه وويل چې د هلمند والي امنيتي مسوولينو ته امر کړى چې له دې وروسته په ياده سيمه کې د خلکو د لامبلو مخه ونيسي.

د يادونې ده، د کوچني اختر په ورځو کې هم يو کس په همدې سيمه کې په سيند کې د ډوبېدو له امله ژوند له لاسه ورکړى و.

[/restrict]