ګردېز (پژواک، ٣٠ چنګاښ ١۴٠١): نامعلومو وسلهوالو د پکتيا ولايت په مرکز ګردېز کې د دارالمعلمين يو استاد وژلى دى.
د يادې ادارې يوه استاد چې نه يې غوښتل نوم يې خپور شي، پژواک خبري اژانس ته وويل چې ياد استاد بختمحمد همت نومېده او له تېرو لسو کلونو راهيسې د پښتو څانګې استاد و.
د نوموړي په خبره، دغه استاد تېر ماښام په خټاوې سيمه کې کور ته پر لار و چې وسلهوالو پرې بريد کړى دى.
دغهراز د پکتيا د اطلاعاتو او کلتور رييس خالقيار احمدزي پژواک ته وويل چې دغه پېښه تېر مازیګر په اریانا پمپ سیمه کې رامنځته شوې ده.
ده وويل، ياد استاد لومړی ټپي شوى او روغتون ته له رسېدو وروسته یې ساه ورکړې ده.
نوموړى وايي، د پېښې اصلي لامل معلوم نه دى، خو ويل کېږي چې د شخصي ستونزو له امله وژل شوى دى.
د يادونې ده چې په تېرو څو مياشتو کې پکتيا کې د ورته وژنو څو پېښې رامنځته شوې دي.
Views: 518
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن