په سمنګان کې د پستې حاصلات درې برابره ډېر شوي

ایبک (پژواک، ۹ زمری ۱۴۰۱): د سمنګان ولایت د کرنې ریاست وایي، په دغه ولایت کې د پستې حاصلات د تېر کال په پرتله درې برابره زیات شوي او له بلې خوا یې بیه هم د تېر کال په پرتله لوړه شوې ده.

د سمنګان د کرنې، اوبو لګولو او مالدارۍ ریاست د ځنګلونو او طبیعي سرچینو مدیر عبدالغفور کریمي پژواک خبري اژانس ته وویل، د دوی وروستۍ څېړنې ښيي چې په روان کال کې د دغه ولایت د پستې حاصلات د تېر کال په پرتله درې برابره زیات شوي دي.

کریمي زیاته کړه، تېر کال په دغه ولایت کې ۷۰ ټنه پسته راټوله شوې وه، خو روان کال به دغه اندازه ۲۱۰ ټنه ته ورسېږي.

د کرنې ریاست د طبیعي سرچینو مدیر وویل، له یوې خوا سږ کال د تېر کال په پرتله پستې ښې پخې شوې او له بلې خوا یې ونو زیات حاصل نیولی، په همدې خاطر یې کیفیت ډېر ښه دی او هم زیات حاصل لري چې په بازار کې یې بیې هم لوړې شوې دي.