پارون ( پژواک ۱۹ زمری ۱۴۰۱): په نورستان ولایت کې یوه سیمه ییزه راډیو تر یوولسو میاشتو ځنډ وروسته بېرته خپرونې پیل کړې.
د الینا په نوم دا راډیو د نورستان ولایت په نورګرام ولسوالۍ له تېرو دولس کلونو راهیسې د اېف اېم په څپو خپرونې کولې ، خو د تېر جمهوري نظام تر سقوط وروسته ددغې راډیو خپرونې هم بندې شوې.
د الینا راډیو مسوول بشیراحمد احمدي پژواک خبري اژانس ته وویل چې د اقتصادي ستونزو امله یې ونه شو کړای راډیو فعاله وساتي نو له همدې امله یې خپرونې وتړلې.
د احمدي په خبره د جمهوري نظام پرمهال کې ورته یو شمیر کمپنیو اعلانات ورکول او همدغه لامل و چې د دوی ګزاره پرې کېده .
د یادې راډیو د پرانستې په مراسمو کې چې د زمري په ۱۹مه، ترسره شول، د نورستان مرستیال والي شیخ زرمحمد حقاني ، د ژونالستانو د ټولنې رییس حجت الله مجددي او مرستیال فرهاد بهروز او خبریالانو د یووالي ټولنې رییس محمدابراهیم آمرخیل هم ګډون کړي وو .
مجددي وویل ، د خبریالانو د مدافع په توګه به تل هڅه وکړي چې رسنیو ته خوندي چاپیریال رامینځته او معلوماتو ته لاسرسی ډیر کړي.
هغه د خبریالانو له نړیوالو ټولنو او بنسټونو هم وغوښتل چې د افغانستان د خبریالانو ملاتړ وکړي .
Views: 33
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن