میمنه (پژواک، د وږي لومړۍ نېټه ۱۴۰۱): فاریاب کې سیمه ییزې سرچینې وايي چې د دغه ولایت په لولاش ولسوالۍ کې یو سړی او یوه ښځه په ډزو وژل شوي دي.
د فاریاب د لولاش ولسوالۍ امنیه قوماندان داملا محمدهاشم خورشید د دغه خبر د تایید ترڅنګ پژواک خبري اژانس ته وویل، سړی موسی قصاب نومېده او د لاشي کلي اوسېدونکی و او ښځه د تهخېل کلي وه چې تېره ورځ ووژل شول.
خورشید زیاته کړه: «د لومړنیو معلوماتو له مخې، موسی قصاب تهخېل کلي ته تللی و، هلته یوه کور ته دننه شوی و او له یوې ۲۴ کلنې ښځې سره په یوه کوټه کې ناست و چې له موضوع د ښځې ورور عبدالملک نومی خبرېږي، دواړه نیسي او په ډزو یې وژني.»
هغه وویل، جنايي پرسونل او پولیس دغه کلي ته چې د لولاش تر ټولو لرې پرته سیمه ده، استول شوي څو قضیه له نږدې وڅېړي او قاتل ونیسي.
یوې سیمهییزې باوري سرچینې چې نه یې غوښتل نوم یې واخیستل شي، وویل: «د ښځې مېړه له سیمې لرې مزدوري کوي، کله چې یې ورور خبرېږي چې خور یې له پردي سړي سره په یوه کوټه کې ناسته ده، دواړه تړي او د سیمې سپینږیرو ته یې ښيي.»
سرچینې زیاته کړه، کله چې سپینږیري له کوره وځي، نو ملک نومي خپله خور او پردی سړی په ډزو ووژل.
