لویډ اسټین: په افغانستان کې د امریکا کار لا هم نه دی تمام شوی

اټلانټا (پژواک، ۹ وږی ۱۴۰۱): د امریکا د دفاع وزیر لویډ اسټین په افغانستان کې له خپلې شل کلنې جګړې د دفاع کولو ترڅنګ ویلي چې دوی له ځانه د دفاع په موخه دغه هېواد ته ځواکونه لېږلي وو.

نوموړي دغه څرګندونې پرون د امریکا په فلوریډا ایالت کې د ځانګړو ځواکونو قوماندان د تبدیلۍ په مناسبت نیول شوو مراسمو کې په داسې حال وکړې چې نن (د وږي نهمه) له افغانستانه د امرېکايي ځواکونو د وتلو يو کال پوره کېږي.

اسټین ويلي چې په افغانستان کې د امریکا په ماموریت کې ځانګړو ځواکونو مهم رول درلود چې د امریکا ولس پرې ویاړي.

هغه زياتوي: «موږ او د ناټو متحدین د دې لپاره افغانستان ته تللي وو، څو افغانان یو ښه راتلونکی ولري.»

د امریکا د دفاع وزیر دغه راز ویلي، کله چې دی په عراق او افغانستان کې د امریکایي ځواکونو قوماندان و، نو هغه مهال ورته معلومه شوه چې ځانګړي ځواکونه مهم ماموریت ترسره کوي.

نوموړي په افغانستان کې د امریکا له جګړې دفاع وکړه، خو دا یې هم وویل چې هلته لا د امریکا کار نه دی تمام شوی.

خو د افغانستان سرپرست حکومت چارواکو په وار وار ویلي چې نړۍوال، په ځانګړې توګه امریکا دې د افغانستان خپلواکۍ ته درناوی وکړي او فشارونه د مسایلو د حل لار نه ده.

د اسټین په وینا، د سپټمبر له بریدونو وروسته یې ځواکونه د امریکا د امنیت خوندیتوب لپاره افغانستان ته ولاړل؛ ځکه چې القاعده پر امریکا برید کړی و.

هغه زیاته کړه: «هغوی (القاعده) د دا ډول نورو بریدونو پلان هم درلود؛ ځکه چې طالبانو هغه مهال القاعده ته په افغانستان کې خوندي ځالې ورکړې وې.»

خو د امریکا د دفاع وزیر وویل، افغانستان ته د امریکایي ځواکونو له تګ وروسته پر امریکا  او یا د نړۍ نورو سیمو کې دا ډول نور بریدونه ونه شول.

اسلامي امارت پر افغانستان د امريکا له بريد مخکې هم ويلي وو او اوس هم وايي، هيچا ته اجازه نه ورکوي چې د افغانستان خاوره د بل کوم هېواد پر ضد وکاروي.

اسټین په افغانستان کې د القاعده د مشر ایمن الظواهري وژلو ته په اشارې سره ویلي، اوس هم باید امریکا له ترهګرۍ سره پر مبارزې ډېر تمرکز ولري.

د امريکا ولسمشر څه موده مخکې وويل چې الظواهري په کابل کې د امريکا د بې پيلوټه الوتکې په بريد کې وژل شوی، خو د افغانستان سرپرست حکومت وايي چې د الظواهري وژل تر اوسه د ادعا په حد کې دي او په تړاو يې څېړنې روانې دي.

اسټین وایي، کله چې امریکایان په افغانستان کې د خپلو ځواکونو د دوو لسیزو ماموریت ته ګوري، نو حتماً په  ذهن کې یې شوي لګښتونه او قربانۍ راځي.

نوموړي وویل، دا ډول بحثونو ته باید دوام ورکړل شي او ورته درناوی وشي.