اټلانټا (پژواک، ۲۰ وږی ۱۴۰۱): یو شمير تاریخپوهان وایي چې د بریتانیا مړه شوې ملکه الیزابیت د څلورو کلونو لپاره د پاکستان ملکه هم پاتې شوې وه.
د بریتانیا ملکه الیزابیت چې د تېرې پنجشنبې په ورځ د ۹۶ کلونو په عمر مړه شوه، شاوخوا ۷۰ کاله یې پاچهي وکړه.
په پاکستان کې د سياسي او تاريخي چارو پوهان وايي چې د بریتانیا دوېمه ملکه الیزابیت د پاکستان له ازادېدو وروسته په لومړیو کلونو کې د پاکستان په سياسي او اقتصادي ثبات کې ډېر مهم رول لوبولی دی۔
دوی وایي چې هغې په ۱۹۶۱ زېږدیز کال کې د پاکستان کراچۍ، لاهور او خیبر پښتونخوا ښارونو ته سفرونه هم کړي وو او له ځایي مخورو او قومي مشرانو سره یې لیدلي وو.
د خیبر پښتونخوا مرکز کې د پېښور پوهنتون د سياسياتو څانګې استاد ډاکټر محمدزبېر وایي، د پاکستان له جوړېدو وروسته له ۱۹۵۲ څخه تر ۱۹۵۶ کلونو پورې ملکه الېزابیت د قانون له مخې د پاکستان ملکه هم وه؛ ځکه هغه مهال پاکستان اساسي قانون نه درلود.
نوموړي ډیوه راډیو ته ویلي، هغه مهال پاکستان يو نوی هېواد و ، له اقتصادي، سیاسي او امنیتي ننګونو سره مخ و او له دغو ننګونو سره د مقابلې لپاره یې یوې کلکې ستراتیژۍ ته اړتیا لرله.
ډاکټر زبیر وایي، هغه مهال د پاکستان په بهرنۍ او نورو اقتصادي او سیاسي تګلارو کې ملکې ډېر مهم رول لوبولی و.
د پېښور پوهنتون د تاريخ څانګې استاد ډاکټر الطاف قادر وایي، دا چې پاکستان پخوا د بریتانیا مستعمره و، خو خلکو ترې کرکه لرله، نو ملکې د دې لپاره چې د خلکو په زړونو کې مینه پیدا کړي، خیبر پښتونخوا او نورو ښارونو ته یې سفرونه وکړل.
د نوموړي په وینا، ملکه الیزابیت خیبر ایجنسۍ ته هم تللې وه او له قومي مشرانو سره یې لیدلي وو.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن