په کابل ښار کې د سړک جوړولو درې پروژې پرانیستل شوې

کابل (پژواک ۲۸ تله ۱۴۰۱): کابل ښاروالي وايي، په کابل ښار کې د ۷۱ میلیونو افغانيو په لګښت د سړک جوړولو د درېيو پروژو چارې بشپړې او د دوو نورو پیل شوې.

دغه مطلب د کابل ښاروالۍ په خپل ټويتر کې بیان کړی او زياته کړې يې ده چې دغه پروژې د کابل ښاروال مولوي عبدالرشید له خوا په داسې حال کې چې د لوړو زده کړو سرپرست وزیر شیخ ندا محمد ندیم، په فرهنګي چارو کې د اطلاعاتو او فرهنګ وزارت مرستیال مولوي عتیق الله عزیزي، د رسنیو او اطلاعاتو د مرکز رییس انعام الله سمنګاني، د اسلامي امارت د ویاند مرستیال بلال کریمي او د قطر په سیاسی دفتر کې د اسلامي امارت استازی عمار یاسر هم حاضر وو، پرانیستل شوې.

سرچينه زياتوي، په روان کال کې د بګرامیو نساجي سړک په دوو برخو کې په ټولیزه توګه د (۲۵۳۰) متر په اوږدوالي او (۱۰.۵) متر پراخوالي، د کارته نو تپې په سر په دوو برخو کې په ټولیزه توګه د (۲۹۰) متر په اوږدوالي او بېلابېل پراخوالي، د وزیر محمد اکبر خان له پنځلسم سړک څخه د شېرپور تر لومړي سړک پورې د (۳۹۱) متر اوږدوالي او (۲۲.۵) متر پراخوالي سره د کابل ښاروالۍ له کورنۍ بودجې څخه د (۷۱۰۰۰۰۰۰) افغانیو په لګښت د سړک جوړولو چارې بشپړې او نن ګټې اخیستلو ته وسپارل شول.

سرچينه کاږي، همداراز د (۷۳۰) متر په اوږدوالي او (۳۰) متر پراخوالې سره د امنیت پروژي – قلعه زمان خان سړک، د (۱۰۸۴) متر اوږدوالي او (۱۴.۱۶ او ۲۰) متر پراخوالي سره له وزیر محمد اکبر خان سیمې څخه تر قلعه موسی او بي بي مهرو پورې د نښلوونکي سړک، د څنډو ویالو او د (۱۱۰۵) حجم په درلودلو سره استنادي دېوالونو په ګډون د جوړولو چارې نن پیل شوې.