کابل (پژواک، ۱۵ لړم ۱۴۰۱): د سرحدونو، قومونو او قبایلو چارو وزارت وایي، د بدخشان د پامیر سړک رغولو او دغه راز د لومړي ځل لپاره پامیر کې د یوې مخابراتي شبکې فعالولو وړاندیزونه منل شوي او د ورېښمو لارې پاتې کارونه به هم پیل شي.
د سرحدونو، قومونو او قبایلو چارو وزارت په خبرپاڼه کې راغلي چې د دغه وزارت سرپرست وزیر ملا نورالله نوري تېره ورځ د بدخشان د واخان ولسوالۍ د پامیر سیمې له مشرانو سره وکتل.
سرچينې لیکلي، ملا نورالله د یادې سیمې د خلکو لپاره د لومړنیو اسانتیاوو برابرولو په برخه کې د پرمختګونو ډاډ ورکړ او زیاته یې کړه چې د اسلامي امارت مشرتابه د پامیر محرومې سیمې ته ځانګړې توجه کوي او په نږدې راتلونکي کې به د ورېښمو لارې پاتې کارونه هم پیل او بشپړ شي.
د ورېښمو لار د بدخشان د واخان دهلېز له لارې افغانستان له چین سره نښلوي؛ هر کله چې د ورېښمو لارې طرحه عملي شي نو دغه لار د بدخشان واخان بندر د چین د سینکیانګ له ایالت سره نښلوي.
د ورېښمو لاره پخوا هم د چین، افغانستان او سیمې تجارتي لاره وه او اوس بیا د سیمې حکومتونه غواړي څو دغه لاره ورغوي.
ملا نورالله نوري ویلي: «د واخان او پامیر د خلکو اساسي غوښتنې مو له اړوندو ارګانونو سره شریکې کړې، تر اوسه د پامیر د سړک رغولو ترڅنګ د یوې مخابراتي شبکې پایې فعالولو وړاندیزونه منل شوي چې ډېر ژر به پامیر له ترانسپورټي او مخابراتي لارو له مرکز سره وصل وشي او په نږدې راتلونکي کې به د روغتیا او تعلیم په اړه هم انشاءالله پرمختګونه ترسره شي.»
په خبرپاڼه کې راغلي، د پامیر مشرانو په دې لیدنه کې ټینګار کړی چې دغه وزارت دې د پامیري ولس ستونزو په هواري کې همکاریو ته دوام ورکړي.
Views: 134
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن