<p style="text-align: justify;">کابل (پژواک، ۲۴ لړم ۱۴۰۱): د چارو اداره وایي، د لغوه شوو ادارو سلګونه کارکوونکو ته معاشونه ورکوي او دغه لړۍ پيل شوې ده.</p>
<p style="text-align: justify;">د چارو ادارې نن (سه شنبه) په خپله ټویټرپاڼه کې ویلي: «د چارو ادارې له لوري د اړوندو ارګانونو په همکارۍ د لغوه شویو ادارو کارکوونکو ته د معاشونو وېش روان دی، چې پیل يې د سولې په چارو کې د دولت وزارت له کارکوونکو شوی دی.»</p>
<p style="text-align: justify;">سرچینه وایي، د معاشونو دغه وېش چې تېره ورځ پیل شو، د اونۍ تر پایه به دوام ولري چې په کې به د ۷ لغوه شوو ادارو سلګونو مامورینو او د یوې مدغم شوې ادارې د کارکوونکو باقي معاشونه ورکړل شي.</p>
<p style="text-align: justify;">د سرچینې په وینا، د چارو ادارې د مالي او اداري ریاست مسؤولینو ویلي، د سولې په چارو کې د دولت وزارت، ولسي جرګه، مشرانو جرګه، د ټاکنیزو شکایتونو کمېسیون، په پارلماني چارو کې د دولت وزارت، د اداري فساد پر وړاندې د مبارزې کمېسیون هغه ادرسونه دي چې لغوه شوي او کارکوونکو ته يې معاشونه اجرا کېږي.</p>
<p style="text-align: justify;">سرچينه کاږي، د اداري اصلاحاتو او ملکي خدمتونو ادارې اړوند ۲۹۰ کسان چې ۲۸ يې ښځې دي، هم په دې لست کې دي چې پاتې شوي معاشونه به يې ورکړل شي.</p>
<p style="text-align: justify;">د سرچینې په حواله، د لغوه شوو ادارو ټول کارکوونکي چې بالمقطع هم په کې شامل دي، ۲۴۴۴ تنه کېږي چې ۲۴۹ يې مېرمنې دي، دوی ته د اسلامي امارت له واکمنۍ وروسته معاشات ورکول کېږي.</p>
<p style="text-align: justify;">سرچینه زیاتوي، وړاندې تر دې چې دغه وېش پیل شي، د لغوه شوو ادارو د کارکوونکو اړوند یو کمېسیون ټاکل شوی و چې د هغوی د معلوماتو پر اساس، د هرې ادارې تشکیلات ولیدل شول او پرېکړه وشوه چې د تېر لمریز کال د زمري له میاشتې وروسته ورته معاشونه حواله کړل شي.</p>
<p style="text-align: justify;">سرچینې زیاته کړې، په دې ادارو کې ځينې داسې هم وې چې د ځینو میاشتو معاشونه يې همکارانو ته ورکړل شوي وو، ځکه خو د وېشل کېدونکو معاشاتو موده سره متفاوته ده.</p>
