فراه ښار (پژواک، ۲۶ لړم ۱۴۰۱): د فراه په مرکز کې د هاوان مرمۍ د چاودنې له امله درې ماشومان وژل شوي دي.
پېښه نن مازیګر شاوخوا څلور بجې د مرکز اړوند په عسکر اباد کلي کې شوې ده.
د دغې سیمې یوه اوسېدونکي نو خان پژواک خبري اژانس ته وویل، دغو درېیو ماشومانو د هاوان یوه مرمۍ موندلې وه او لوبې یې ورباندې کولې چې د چاودنې له امله یې درې واړه ځای پر ځای وژل شوي دي.
هغه زیاته کړه، درې واړه وژل شوي ماشومان سره وروڼه او د برات نومي کس زامن دي چې په اصل کې د یاد ولایت د خاک سفید ولسوالۍ د رنج کلي اوسېدونکي دي او اوسمهال په ښار کې استوګن وو.
دی وايي، نوموړي څلور زامن لرل چې له درېیو یې نننۍ پېښې ژوند واخیست.
د فراه د امنیې قوماندانۍ مطبوعاتي مسوول او ویاند مولوي محمد نسیم بدري هم پژواک خبري اژانس ته پېښه تاییده کړه او ویې ویل، په دې پېښه کې د یوې کورنۍ درې ماشومان وژل شوي دي.
هغه زیاته کړه، امنیتي کسانو پلټنې پیل کړې څو معلومه کړي چې دغو ماشومانو د هاوان مرمۍ له کومه کړې وه؟
د فراه په ګډون په ډېرو ولایتونو کې سيمې د تېرو جګړو له پاتې شوو ناچاوده توکو خوندي شوې نه دي چې وخت نا وخت ماشومانو او لویانو ته مرګژوبله اړوي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن