جلالاباد (پژواک، ۳ لېندۍ ۱۴۰۱): د ننګرهار کرنې رياست له لوري د دغه ولايت په شيرزادو ولسوالۍ کې ۵۸۸ کورنيو ته د کارموندنې په موخه د کورنيو چرګانو روزنې زمينه برابره شوه.
چارواکي وايي، هرې کورنۍ ته د يوې نړۍوالې مرستندويه ادارې په همکارۍ ۳۰ کورنۍ چرګې او اړوند نور توکي ورکړل شول.
د ننګرهار د کرنې رييس مولوي عبدالستار محمد نن (د لېندۍ ۳مه) پژواک اژانس ته وويل، د دغه ولايت د شيرزادو ولسوالۍ ۵۸۸ اړو کورنيو ته يې د کار او ګټېوټې زمينه برابره کړه.
هغه زياته کړه، هرې کورنۍ ته د خوړو او کرنې نړۍوال سازمان ( FAO) په مالي لګښت ۳۰ کورني چرګان، ۱۵۰ کيلوګرام د چرګانو د خوراک دانه او نور اړوند وسايل ورکړل شول.
هغه وايي، د دغې مرستې موخه په کور دننه د چرګانو روزنې او دغه صنعت ته پراختيا ورکول دي چې هېواد د پر ځانبسياينې لور ته لاړ شي.
دی وايي، هڅه کې دي چې دغه پروګرام نورو ولسواليو ته هم وغځول شي او د ټولو ولسواليو اړو کورنيو ته په خپل کور کې د کار او ګټې وټې زمينه برابره کړي.
لاجبر چې د شېرزادو ولسوالۍ د پټلو سيمې اوسېدونکی کروندګر دی وايي، يوازې کرنه يې د ژوند اړتياوې نه شي پوره کولی، خو د دغو چرګانو روزنه، د هګيو او چرګانو له خرڅلاو سره به وکړای شي چې د ژوند اړتياوې پوره کړي.
تر دې وړاندې د کرنې رياست په ځينو ولسواليو کې ښځو ته د سبزيو د توليد کورنۍ باغچې هم جوړې کړې دي چې د ډېرې ګټې وټې زمينه يې ورته برابره کړې ده.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن