کابل (پژواک، ۸ لېندۍ ۱۴۰۱): د کور او ښارجوړولو وزارت سرپرست وایي، هندي پانګهوال دې په افغانستان کې د ښاري سکټور او مسکن برخو، په ځانګړې توګه نوي کابل ښارګوټي پروژه کې پانګونه وکړي.
د کور او ښار جوړولو وزارت پر خپله ټویټرپاڼه لیکلي چې د دغه وزارت سرپرست مولوي حمدالله نعماني دغه څرګندونې په کابل کې د هند له شارژدافیر بهارت کومار او مل پلاوي سره په لیدنه کې کړې دي.
سرچینه زیاتوي: «سرپرست وزیر د خپلو خبرو په دوام یادونه وکړه چې هندي پانګهوال دې راشي، افغانستان کې دې د ښاري سکټور او مسکن برخو، په ځانګړې توګه کابل جدید ښارګوټي پروژه کې پانګونه وکړي.»
په دې لیدنه کې نعماني یادونه وکړه، په تېر کې د هند حکومت په افغانستان کې یو شمېر پروژې پلې کړې چې ځینې یې بشړې شوې خو لګښت یې نه دی ورکړل شوی، ځینې نیمهکاره پاتې دي او ځینې نورې لا هم نه دي پلې شوې.
په دې لیدنه کې نعماني وغوښتل چې د هند حکومت دې په افغانستان کې د یادو پروژو برخلیک معلومولو په اړه خپل دریځ روښانه کړي.
دغه راز په یاده لیدنه کې غوښتنه وشوه چې د هند حکومت دې د کور او ښارجوړولو وزارت کارکوونکو لپاره د ظرفیت لوړونې، ماسټرۍ او دوکتورا په کچه تحصیلي بورسونو برخه کې سکالرشیپونه چمتو کړي.
د هند سفارت شارژدافیر بهارت کومار وویل، د کور او ښارجوړولو وزارت دې په افغانستان کې د هند حکومت اړوند ټولو پروژو لېست له دوی سره شریک کړي او دوی به یې په اړه له خپل حکومت سره خبرې وکړي او هڅه به وکړي چې شته ستونزې حل او پروژې ګټې اخیستنې ته وسپارل شي.
هغه زیاته کړه، د نوي کابل ښارګوټي پروژه کې د پانګونې په موخه به لا زیات جزئیات ترلاسه کړي او په اړه به یې له هندي پانګهوالو سره د پانګونې په موخه خبرې وکړي.
د ظرفیت لوړونې برخه کې د هند سفارت شارژدافیر وویل چې اوسمهال د ویزو ورکولو ستونزه شته او دوی په انلاین بڼه د لنډمهاله زدهکړو ځیني لینکونه د بهرنیو چارو له وزارت سره شریک کړي چې د کور او ښارجوړولو وزارت کولای شي ګټه ترې واخلي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن