کابل (پژواک، ۱۰ لېندۍ ۱۴۰۱): ځينو بهرنیو او پخوانيو افغان چارواکو د سمنګان په يوه مدرسه کې چادونه غندلې او دغه کار يې د ټولو انساني او اسلامي ارزښتونو خلاف عمل بللی دى.
تېره ورځ ماسپښین شاوخوا یوه بجه، د ایبک ښار اړوند په «الجهادیه» مدرسه کې د ماسپښین د لمانځه پر مهال چاودنه وشوه چې له امله يې ۱۹ کسان وژل شوي او ۲۵ نور ټپيان دي.
ياده چادونه په کور دننه او بهر کې بېلابېلو سرچينو غندلې ده.
د افغانستان پخواني ولسمشر حامد کرزي دغه چادونه په کلکو ټکو غندلې او ويلي يې دي: «دغه تروریستي کړنه او بشري ضد جنایت د افغانستان د خلکو د دښمنانو کار او د ټولو انساني او اسلامي ارزښتونو خلاف عمل بولم.»
د ملي مصالحې عالي شورا مخکني مشر ډاکټر عبدالله عبدالله هم پر يادې چاودنې خواشيني ښودلې او ويلي يې دي: «پر لمونځکوونکو، زدهکوونکو، ديني مدرسو او عبادتځايونو باندې بريد له اسلامي او انساني ارزښتونو سره په ټکر کې دی او محکوم دی.»
د ملي ثبات ټولنې مشر ضياءالحق امرخېل وايي: «د سمنګانو ولايت په يوې مدرسې کې د رامنځته شوې پېښې له امله چې زموږ لسګونو هېوادوالو ته په کې مرګژوبله اوښتې، نهایت زيات ودردولم.»
د ملګرو ملتونو له ماشومانو د ملاتړ صندوق (یونیسف) هم پر ياد بريد خواشيني ښولې او ويلي يې دي چې ماشومان باید هېڅکله د تاوتریخوالي هدف ونه ګرځي.
سرچينه زياتوي: «په افغانستان کې د روان زېږديز کال په لومړۍ نیمايي کې د هغو بريدونو له امله چې په ښوونځيو او روزنيزو مرکزونو کې شوي، لږ تر لږه ۲۸۸ تنو ته مرګژوبله اوښتې.»
یونیسف په افغانستان کې له ټولو خواوو غوښتي چې د ماشومانو د خونديتوب لپاره ډېر څه وکړي؛ ځکه ماشومان سولې ته اړتیا لري څو له خپل ماشومتوبه خوند واخلي.
د افغانستان لپاره د امريکا ځانګړي استازي ټام وېسټ پر خپل ټوېټر د سمنګانو بريد يو تریخ خبر بللی او زياته کړې يې ده: «د امریکا متحده ایالتونه د بېګناه ملکي وګړو پر وړاندې دغه بېرحمانه برید غندي، ټول افغان ماشومان حق لري چې له وېرې پرته ښوونځيو ته ولاړ شي.»
د افغانستان لپاره د امريکا سفارت سرپرستې کرن ډیکر هم ياده چاودنه غندلې او ويلي یې دي: «د افغان ماشومانو پالنه او ساتنه باید وشي، موږ باید د خپلو ماشومانو له ژوند څخه ترهګري له منځه یوسو.»
د افغانستان د ښځو او بشري حقونو لپاره د امریکا ځانګړې استازې رینا امیري ويلي: «د ماشومانو پر وړاندې دغه ډول بزدلانه تاوتریخوالی د افغانستان پر راتلونکي برید دی او باید ودرول شي.»
د يادې چاودنې مسؤوليت تر اوسه چا پر غاړه نه دی اخيستی.
GET IN TOUCH
NEWSLETTER
SUGGEST A STORY
PAJHWOK MOBILE APP