د کابل په چهارقلعه سيمه کې چاودنه وشوه

کابل (پژواک، ۴ مرغومی ۱۴۰۱): د کابل امنيتي مسوولین وايي، د شپږمې امنيتي حوزې اړوند په چهارقلعه سيمه کې چاودېدونکي توکي چاودلي دي، خو مرګ‌ژوبله نه لري.

د امنيه قومندانۍ وياند خالد ځدراڼ پژواک خبري اژانس ته وویل چې دغه پېښه نن ماښام شاوخوا شپږ نيمې بجې د چهارقلعه سیمه کې د تېلو يوه پمپ ته نږدې د يوې غرفې څنګ ته شوې ده.

ده زياته کړه، د لومړنيو معلوماتو له مخې، پېښه مرګ ژوبله نه لري، خو د پولیسو د پلټنې ډله سيمې ته رسېدلې ده ترڅو د چاودنې نوعيت معلوم کړي.