په لغمان، کابل او میدان وردګو کې له بېوزله کورنیو سره مرسته وشوه

کابل (پژواک، ۸ مرغومی ۱۴۰۱): په لغمان کې له ۷۲ بېوزله کورنیو سره نغدي مرسته، ميدان وردګو کې د مچيو له ۳۷ روزونکو سره د وسایلو او د کابل خاکجبار کې له ۵۰ بېوزلو کورنيو سره د خوراکي توکو مرسته وشوه.

د لغمان د کډوالو چارو رییس مولوي غلام‌الرحمن بلال پژواک خبري اژانس ته وویل، پرون د ملګرو ملتونو د کډوالو چارو عالي کمېشنرۍ(UNCHR)  په مالي ملاتړ د دغه ولایت په مرکز مهترلام کې له ۷۲ بې‌وزله کورنیو سره نغدي مرسته وشوه.

بلال زیاته کړه، هرې کورنۍ ته ۸۰۰ امریکايی ډالر ورکړل شول.

بلخوا، د میدان وردګو د کرنې او مالدارۍ ریاست پژواک خبري اژانس ته په رالېږلې خبرپاڼه کې ویلي چې تېره ورځ یې د امریکا نړۍوال پرمختیایي پرواګرام (USAID) په مالي ملاتړ د دغه ولایت په کچه د مچیو ۳۷ روزونکو ته د یوې ورځې لپاره مسلکي روزنه ورکړې او اړوند وسایل یې پرې وېشلي دي.

سرچینه وایي چې د مچیو یادو روزونکو هر یوه ته د ۲۵ زره افغانیو په ارزښت وسایل ورکړل شوي دي.

دغه راز د کابل په خاکجبار ولسوالۍ کې له ۵۰ بېوزلو کورنيو سره د خوراکي توکو او البسې مرسته وشوه.

د خاکجبار د خیریه بنسټ استازي بلال شينواري پژواک اژانس ته وویل چې دغه مرسته له هېواد بهر او دننه د خاکجبار ولسوالۍ د اوسېدونکو په مالي امکاناتو برابره شوې او هرې کورنۍ ته يوه بورۍ اوړه، يوه بورۍ وريجې، يوه بوشکه غوړي، نيم من مۍ او ژمنۍ ګرمه البسه ورکړل شوه.