سرپل (پژواک، ۱۲ مرغومی ۱۴۰۱): د سرپل په سانچارک ولسوالۍ کې د اوبو رسونې د دوو پروژو چارې، د ۱۰۰ زره امریکایي ډالرو په لګښت پیل شوې.
یادې پروژې د ملګرو ملتونو پرمختیایي پروګرام (UNDP) په مالي ملاتړ، د «راه» موسسې په همکارۍ پلې کېږي.
د راه موسسې د دفتر مسوول سید امانالله یعقوبي پژواک اژانس ته وویل: «دوه ژورې څاهګانې چې له هغو څخه به د پایپونو له لارې خلکو ته اوبه ورکړل شي، د ۱۰۰ زره ډالرو په لګښت کېندل کېږي.»
هغه زیاته کړه چې د یادو پروژو لګښت د ملګرو ملتونو پرمختیايي پروګرام له خوا ورکول کېږي.
نوموړي وویل، د یادو پروژو کارونه به تر څلورو میاشتو پورې بشپړ شي.
نوموړي زیاته کړه: «یوه څاه په ارجتو کلي او بله څاه په خواجه سرخ کلي کې وباسو چې لږ تر لږه ۱۵۰۰ کورنۍ به د څښاک له اوبو برخمنې شي.»
د سانچارک ولسوالۍ د ارجتو کلي یوه مشر فضلاحمد د راه دفتر له دغه اقدامه هرکلی وکړ او ویې ویل، د څښاک پاکې اوبه د خلکو اساسي اړتیا ده .
هغه وویل: «مخکې مو د خپلې اړتیا وړ څښاک اوبه له لرې ځایه پر حیواناتو راوړلې، د یادې څاه په کېندلو سره زموږ ستونزه به د اوبو له درکه هواره شي.»
د یادونې ده، په وروستیو څو کلونو کې د هېواد د بېلابېلو سیمو خلکو تر ځمکې لاندې اوبو د سطحې ټيټېډو له امله شکایت درلود.
GET IN TOUCH
NEWSLETTER
SUGGEST A STORY
PAJHWOK MOBILE APP