تالقان (پژواک، ۱۷ مرغومی ۱۴۰۱): د امو سیند اوبو د ویجاړیو له امله د تخار ولایت د کوکچې پورې غاړې ولسوالیو اوسېدونکو د اندېښنو له زیاتېدو سره هممهاله، د یو شمېر وزارتونو یوه ګډ پلاوي تخار ولایت ته سفر کړی او د دغه سیند د غاړو تحکمیاتو کار له پیله یې خبر ورکړی دی.
د کرنې وزارت سرپرست مولوي عطاءالله عمري د یوه پلاوي په مشرۍ تخار ولایت ته سفر کړی، د امو سیند اوبو له امله یې له ویجاړو شوو ځایونو لیدنه کړې او وايي، د امو سیند ویجاړیو موضوع څو ځلې د کابینې په غونډه کې یاده شوې وه.
د هغه په خبره، وروسته پرېکړه وشوه چې د خلکو ستونزو هواري په موخه یو لوړپوړی پلاوی دغه ولایت ته لاړ شي، څو د خلکو ستونزې له و ارزوي او د حل لپاره یې اقدام وکړي.
عمري مني چې د تحکیماتو نشتوالي له امله د امو سیند اوبو راپورته کېدو زرګونه جریب کرنیزه ځمکه، کورونه او څرځایونه ویجاړ کړي چې د دې ستونزې هواري لپاره به جدي هڅه کوي، څو خلک له دې وروسته په یادو سیمو کې د اوبو راپورته کېدو له امله اندېښنه ونه کړي.
د کرنې وزارت سرپرست ډاډ ورکوي چې د سیمې د اوسېدونکو ستونزې به له نږدې وڅېړي او ژر به د کوکچې پورې غاړې ولسوالیو اړوند د امو سیند د تحکیماتو کار پیل کړي.
په ورته مهال، د امو سیند اوبو راپورته کېدو له امله د ویجاړیو لیدنې لپاره د دغه لوړپوړي حکومتي پلاوي سفر د ځايي خلکو له هرکلي سره مخ شوی دی.
د تخار د دشتقلعه ولسوالۍ اوسېدونکی عزیزالله ناصري وايي: «د امو سیند پر څنډو د تحکیماتو نشتوالي له امله هر کال زرګونه جريب کرنيزه ځمکه، د استوګنې لسګونه کورونه او څرځایونه ويجاړېدل، خو اوس چې حکومت د سیمې خلکو غوښتنې ته پاملرنه کړې او پلاوی یې استولی، موږ یې هرکلی کوو.»
ناصري زیاتوي، د امو سیند د تحکیماتو کار په پیلېدو سره به لسګونو کسانو ته د کار زمینه برابره شي، کرنیزې ځمکې، د استوګنې کورونه او څرځایونه به نور تر اوبو نه لاندې کېږې.
دا په داسې حال کې ده چې له دې مخکې هم پژواک خبري اژانس د دغه سیند پر غاړو د تحکیماتو نشتوالي له امله د ویجاړیو په تړاو د تخار د کوکچې پورې غاړې ولسوالیو د اوسېدونکو اندېښنو په اړه یو راپور خپور کړی و چې اوس له مرکزه دغه ولایت ته د يو لوړپوړي حکومتي پلاوي د سفر شاهد دى.
Views: 78
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن