د پاکستان ولسي جرګې د یوه غړي پر کور بمي برید شوی

کابل (پژواک، ۱۹ مرغومی ۱۴۰۱): په پېښور کې د پاکستان ولسي جرګې د یوه غړي ناصر خان موسی‌زي پر کور د لاسي بم برید شوی دی.

دغه خبر پاکستانۍ ورځپاڼې ډان د ځايي پولیسو له قوله خپور کړی دی.

سرچینې لیکلي، د یک‌شنبې په شپه د پاکستان د ولسي جرګې غړي ناصر خان موسی‌زي پر کور - چې په پېښور ښار کې د پولیسو یوې پوستې ته څېرمه موقعیت لري- د نامعلومو کسانو له ‌خوا برید شوی دی.

د یاد خبر له مخې، نامعلومو کسانو د هغه د کور مېلمستون په نښه کړی او دېوال یې نړولی دی.

پولیسو ویلي چې برید د لاسي بم په وسیله شوی او د پېښې په اړه نورې څېړنې روانې دي.

سرچینې زیاته کړې، دغه پېښه په داسې حال کې شوې چې ناصر خان موسی‌زي په ​​پېښور پریس کلب کې دوه ورځې مخکې خبریالانو ته ویلي و چې ګواښونه ورته متوجه دي.