افغانستان له سعودي سره د راتلونکي کال حج مقدماتي ترتیباتو هوکړه لاسلیک کړه

کابل (پژواک، ۲۰ مرغومی ۱۴۰۱): د افغانستان د ارشاد، حج او اوقافو وزارت پلاوي د سعودي عربستان د حج او عمرې له وزارت سره د  ۱۴۴۴ هجري قمري کال د حج مقدماتي ترتیباتو هوکړه لاسلیک کړې ده.

د ارشاد، حج اوقافو وزارت په خبرپاڼه کې راغلي چې د دغه وزارت مالي او اداري عمومي رییس  مولوي عبدالولي حقاني د سعودي عربستان د حج او عمرې وزارت په رسمي بلنه پرون د ۲۰۲۳ میلادي کال فرضي حج خدمتونو په کنفرانس او نندارتون کې د ګډون په موخه یاد هېواد ته روان شو.

سرچينې لیکلي، حقاني تېره ورځ په جده کې د سعودي عربستان د حج او عمرې وزارت له مرستیال دکتور عبدالفتاح مشاط سره د حج خدمتونو کنفرانس او نندارتون په مرکزي دفتر کې وکتل او د حج پر اړوند مسایلو يې خبرې وکړې.

حج او اوقافو وزارت لیکلي، د دې ترڅنګ د دواړو وزارتونو ترمنځ د ۱۴۴۴ هجري قمري کال د حج لومړنيو ترتیباتو هوکړه‌ليک هم لاسليک شو.