د لوړو زده‌کړو وزارت وايي، د پوهنتونونو نومونو تغییر په اړه خپاره شوي خبرونه حقیقت نه لري

کابل (پژواک، ۲۰ مرغومی ۱۴۰۱): د لوړو زده‌کړو وزارت مسوولین وایي، په ځینو رسنیو کې د افغانستان د دولتي پوهنتونونو د نومونو بدلېدو خبرونه خپاره شوي چې حقیقت نه لري.

د دغه وزارت ویاند حافظ ضیاءالله هاشمي نن د مرغومی په ۲۰ مه په خپله ټویټرپاڼه کې لیکلي: «د ځینو مغرضو خلکو له لوري په جعلي اکاونټونو کې د هېواد د پوهنتونونو د نومونو د بدلون په اړه خبرونه خپاره شوي، چې هیڅ حقیقت نه لري.»

له پرون راهیسې په ټولنیزو رسنیو کې د لوړو زده‌کړو سرپرست وزیر شېخ ندامحمد ندیم ته منسوب داسې خبرونه لاس په لاس کېږي چې ګواکې دی غواړي د هېواد د دولتي پوهنتونونو په ځانګړي ډول د کابل پوهنتون نوم «د کابل نړۍوال اسلامي پوهنتون» ته بدل کړي.

خو د لوړو زده‌کړو وزارت ویاند دا موضوع په کلکه رد کړه.

نوموړي د یوه ویډیو کلیپ په خپرولو سره ویلي چې د لوړو زده‌کړو وزارت سرپرست شېخ ندامحمد ندیم په ټولنیزو رسنیو (ټویټر او فېسبوک) کې هیڅ شخصي اکاونټ نه لري.

نوموړي له خلکو غوښتنه کړې چې پر جعلي پاڼو باور و نه کړي.