پلخمري (پژواک، ۲۵ مرغومی ۱۴۰۱): د بغلان حکومتي مسوولین وايي چې د یونیسف په مرسته يې په دغه ولایت کې د سړې هوا تر ختمېدو د بېکوره ماشومانو ټولولو کمپاین پیل کړى دى.
د بغلان د کار او ټولنیزو چارو رییس قاري نصرتالله پارسا د مرغومي په ۲۵مه پژواک اژانس ته وویل چې د بېوزله او بېکوره ماشومانو لاسنیوي په موخه یې د مرستې او ساتنې کمپاین پیل کړی چې د ژمي تر پايه به دوام ولري.
هغه وايي چې له ۱۲۰ بېوزلو ماشومانو سره يې د ژمنۍ جامو مرسته هم کړې ده.
دغه راز د بغلان ولایت مقام ویاند ملا عالم مجیدي وايي چې د بېکوره ماشومانو ټولولو کمپاین له سړې هوا سره تړلې موقتي پروسه ده چې د بېکوره ماشومانو د ژوند ژغورنې په موخه پیل شوې ده.
خو هغه وويل چې د بېکوره ماشومانو د دایمې ساتنې لپاره پر یوه پلان کار روان دی او ځینو خیریه موسسو سره هم په دې اړه خبرې شوې دي.
د يادونې ده، په بغلان کې له تېرې شپې راهيسې د بېکوره ماشومانو ثبتولو لړۍ پيل شوې خو تر اوسه (نن مازديګر ٣:٣٠ بجې) يو بېکوره ماشوم هم نه دى ثبت شوى.
GET IN TOUCH
NEWSLETTER
SUGGEST A STORY
PAJHWOK MOBILE APP