[restrict paid=”true”]
اټلانټا (پژواک، ۱۵ سلواغه ۱۴۰۱): د پښتون ژغورنې غورځنګ مشر منظور پښتین د پېښور ولسي پاڅون ته ویلي چې د پاکستان اقتصاد خراب شوی، اوس د ډالرو لپاره د پښتنو په سیمه کې نوې جګړه پیلوي.
د پېښور پولیسو په یوه مرکز کې له ځانمرګي برید وروسته د پاکستان د بېلابېلو سیاسي ګوندونو، ولسي خوځښتونو او مدني ټولنې مشرانو او زرګونه پلویان د سلواغې په ۱۵مه د پېښور پرېس کلب مخې ته د «ولسي پاڅون» تر نامه لاندې راټول شوي وو.
څو ورځې مخکې د خیبر پښتونخوا ایالت د مرکز پېښور ښار پولیسو د یوه مرکز جومات کې د ځانمرګي برید له امله له سلو زیات کسان ووژل شول او شاوخوا ۲۲۰ نور ټپیان شوي دي.
د پېښور ولسي پاڅون چې د پښتون ژغورنې غورځنګ د مشر منظور پښتین په رهبرۍ شوی و، په کې محسن داوړ او ګڼو نورو سیاسي مشرانو برخه اخیستې وه.
منظور پښتین د پاڅون ګډونوالو ته وویل چې پښتانه په هيڅ ډول نوره ترهګري نه شي زغملی.
هغه زیاته کړه، د پښتنو په خاوره روانه ترهګري د ډالرو ګټلو په موخه تپل شوې ده؛ ځکه چې د پاکستان اقتصاد په جګړو روان دی او غواړي چې یو ځل بیا د یوې نوې جګړې په پیلولو سره ډالر ترلاسه کړي.
نوموړي وویل چې د پښتنو په خاوره جګړه د اسلام لپاره نه، بلکې له پښتنو سره ده.
منظور پښتین پوښتنه وکړه چې د اسلام په نامه پښتانه ولې وژل کېږي؟
د پښتون ژغورنې غورځنګ مشر وویل چې له اټک پله پورې غاړه په پنجاب کې نه چاودنې کېږي، نه هدفي وژنې کېږي او نه خلک تښتول کېږي، دا هر څه یوازې د پښتنو په سیمه کې ولې کېږي؟
[/restrict]
Views: 34
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن